556/2024-2025

Dated Serchhip, the 25th May, 2024: Nimin khan Er. Vanlalruata Sailo, Secretary Mizoram State Project Monitoring Committee (MSPMC) hovin Sumsuih – Turial Link road (RCC Pavement) siam mek leh NH-54, Aizawl – Tuipang kawngpui siam mek, Serchhip leh Keitum chhehvel leivung paihin a nghawng dan an endik.

MSPMC Secretary chuan MSPMC hian Mizorama hmasawnna hnathawh hrang hrangte dik taka thawh a nih a, a puitlin a mipuiten kan chhawr tangkai ngei theih nan endik leh ven hnaah sawrkar a tanpui zel dawn a, chutianga thawhpui atan chuan Mizo mipui te a sawm bawk a ni.

Ministry of Tribal Affairs, Govt. of India atanga sum hmuh cheng Nuai 426.801 hmanga km 12 a thui siam mek Sumsuih – Turial Link road (RCC Pavement) chu nimin khan a hmunah kalin an en a, ruahman ang taka a puitlin a, tangkai taka hman a nih theih nan an thil hmuh dante thuneitute hnenah an thlen dawn a ni.

Hemi hnu hian MSPMC team te hian NH 54 Aizawl – Tuipang kawng, NHIDCL hnuaia siam mek leivung paihin Serchhip leh Keitum chhehvel ram a nghawng dan an endik nghal a, kawngpui laihna vung paihna (Spoil Bank) an siam mekte a tha tawk em tihte uluk taka en in, a bul hnaia huan leh ram a tihchhiat siam that hna thawh dante an en bakah hmabak hnathawh chhunzawm dan turte an sawipui bawk.He hunah hian kawng laih hna thawktu Kram Infracon Pvt. (Ltd) hotute bakah New Serchhip North leh New Serchhip South VCP te, Keitum VCP te an tel bawk a ni.

MSPMC Secretary hi Pu George Lalzuia, Member MSPMC, Pi Lalremsangi Fanai, Member MSPMC , Pi Vanchhungi, Task Force (MSPMC), Pu Vannunmawia PA to Vice Chairman ten an tawiawm a ni.