4165/2023-2024

Dated Aizawl, the 14th March, 2024: Vawiin khan Mizoram State Project Monitoring Committee te chu an Chairman Pu Lalduhoma, Chief Minister hovin CM Conference Hall-ah an thukhawm a, an hnathawh dan tur thil pawimawh hrang hrang te an rel.

Chief Minister chuan, mipui sawrkar din kan tum tlat a, kan rama hmasawnna hnathawh mekte chak taka a kal a, hun tiam chhunga hna kan zawh thin theih nan leh hmasawnna hmel thar kan hmuh thuai thuai theih nan he committee hi din a ni. Eirukna dona tha lutuk a ni. Party aiawhte, tlawmngaipawl aiawhte, kohhran aiawh thlengin member kan ruat a, a tul angin member hi la ruat belh theih a ni. Kan thuneihna pawh a zauva, dik taka hna kan thawh phawt chuan kan state hian nasa takin kan hlawkpui dawn a ni. Vawiinah member zawng zawng huapin committee kan han thukhawm a, a lawmawm hle. Kan hmalak chhoh dan tur hrang hrangte inhrilhhriatna kan nei ang a, tul dang awm apiangte pawh kan sawi dawn nia, tiin member te a chah a ni.

Vice Chairman Pu RL Rinawma chuan Project endik theih an khawnkhawm tawh te, endik dan kalhmang tur an duan te, team hrang pathuma an inthendarh dan te sawifiahna a ni a. Member ten an rawtna hrang hrang pawh an sawi a ni.

Project Monitoring Committee te hian Mizorama hmasawnna hna thawk mektu contractor zawng zawngte chu tha taka Monitoring Committee hi lo thawhpui turin a sawm a, mipuite pawh an khua leh venga hnathawh mekte tha tawk lova an hriat chuan Project Monitoring Committee hnenah thlen thin turin an ngen a ni.