1809/2024-2025

Aizawl, 29.08. 2024: Nimin (August ni 28, 2024) khan Mizoram State Project Monitoring Committee Team ‘B’ leh ‘C’ te chuan Construction of Aizawl City Centre leh Aizawl City Centre Annexe, New Market, Aizawl chu an Vice Chairman Pu R. Lal Rinawma, hovin an enfiah.

Aizawl City Centre hi cheng vaibelchhe 42.82 senna tur, sak mek lai a ni a. UD&PA Department hnuaia Aizawl Smart City Limited ten a sak hna hi enkawl in, contractor ah Lushai Engineers, Aizawl te hman an ni. He hna hi January, 2023 khan tan niin ni 30th November, 2025 a zawh tura ruahman a ni a. A hna hi za zelah sawmthum pariat (38%) vel zawh tawh a ni a. Mizoram State Project Monitoring Committee te hian hna kal lai hi uluk taka endik in, chak zawk leh tha zawka hna kalpui dan tur Nodal Department leh Contractor te an sawipui a. An harsatna tawh te pawh sut kian dan tur an sawiho bawk.

Aizawl City Centre Annexe hi NEDP sum cheng vaibelchhe 36.41 senna tur, sak mek lai a ni a. Nodal Department hi Commerce & Industries Department niin contractor hi Lushai Engineers, Aizawl a ni. He hna hi 24th June, 2020 ah tan a ni a, tunah hian hna hi za zela sawmsarih panga (75%) vel zawh tawh a ni. Heng building pahnih te hi dawr leh thlai thar zawrhna hmunpui tur a ni.

Vice Chairman, MSPMC hi Er. Lalthanzuala Ralte, Secretary leh member dang ten an tawiawm a. Tun tum hi an vawi hnih tlawhna a ni. MSPMC Team te hi Nodal Department a Officer leh an thawhpui te bakah contractor ten an lo dawngsawng in an tawiawm bawk a ni.