4013/2024-2025

Lawngtlai, 29th January, 2025 : Vawiin khan Mizoram State Project Monitoring Commitee (MSPMC) chuan an Vice Chairman Pu R. Lalrinawma, IRS (Rtd)  kaihhruaiin, Polytechnic Building, Thingkah leh Lawngtlai District Sports Complex, Mampui, hnathawh mek chu a hmunah kalin an enfiah.

Mizoram State Project Monitoring Commitee (MSPMC)  Team- te hian Polytechnic Building - Academic Block, Hostel leh Staff quarters- te an enfiah a. Sak zawh anih atanga hman  a nih loh avangin a hlui chhe tawh hle a, luahlum loha dah reng lo a tangkai zawka hman theih dan tur an zirchiang a ni. Polytechnic Building, Thingkah, hi PWD kaltlangin cheng vaibelchhe riat (8 crore) sênga  sak niin, kum 2013 ah sak tan niin kum 2014 khan sak zawh a ni.

MSPMC  Team- te hian Polytechnic Building an en zawh hian Lawngtlai District Sports Complex, Mampui a hnathawh kal mek an enfiah nghal a. Hnathawh tawh chin that leh that loh bakah hun tiam chhunga zawhfel a ni thei dawn em tih an endik a.  Lawngtlai District Sports Complex -  sak hna  hi Decor India, Guwahati, ten thawk mêkin,  cheng 5019. 43 lakhs seng a sak tur a ni a. Hna hi ni 25, July 2022 ah tan niin, ni 24, July 2025 a zawhfel tura ruahman a ni. MSPMC  Team-te hian hnathawk mêktu Decor India  hotute kawmin, an  hnathawh chungchang an sawipui nghal a ni.

Mizoram State Project Monitoring Commitee (MSPMC)  atang hian Er. Lalthanzuala Ralte, Secretary, Er. Sanghrima Chongthu, Member, Dr. Laldinpuia, Associate Prof. MZU, Member, ⁠Er. H. Laldintluanga, Asst. Prof. MZU, Member leh   ⁠Pi Vanchhungi, Task Force, MSPMC bakah supporting Staff- te an lo kal a. MSPMC Team- hian an thil endik leh zir chian chungchangah report mumal tak siamin Chief Minister hoin  thutkhawm an neih leh dawn a ni.