4012/2024-2025

Lunglei, 2025 Pawlkut thla ni 29: Vawiin chawhnu khan Lunglei District Level Co-ordination Committee for National Deworming Day chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. National Deworming Day (NDD) February Round 2025 kalpui dan tur an sawi ho.

Bawrhsap Pi Navneet Mann chuan nikum August thlaa Lunglei District-a rulhut hlo pek beihpui thlak (National Deworming Day) kalpuiah target 97.06% laiin rulhut hlo an ei chu lawmawm a tih thu sawiin, tun February round lo awm turah hian naupang tam zawkin an ei theih nan thawktute chu theih tawp chhuah turin a chah a ni.

He hunah hian Lunglei Deputy Chief Medical Officer Dr Lalrinthangi chuan  2024 August round-a NDD hman dan report pein, Hnahthial District chu medical lamah Lunglei District huam chhungah an la awm rih avangin NDD-ah pawh huam tel an ni tih a tar lang a. NDD 2025 February round atana ruahmanna awm sate tar lang bawkin, member kal khawmte'n NDD 2025 February round kalpui tur chungchanga thil pawimawh hrang hrang an sawi ho nghal a ni.

National Deworming Day hi kum tin vawi hnih, February thla leh August thlaah te hman ṭhin a ni a. Kumin National Deworming Day February Round hi February ni 10 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tura tih a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi zirna in leh Anganwadi centre-ah te pek leh tura ruahman niin, chumia hmaihte chu an ina kal chilha pek leh turin ruahman a ni.

NDD 2025 February round bul ṭanna leh hawnna hun hi February ni 10, 2025 (Thawhṭanni) chawhnu dar 1-ah Govt Rahsiveng High School, Lungleiah hman tum a ni a. Hemi ni hian Lunglei District leh Hnahthial District chhunga school, college leh anganwadi centre-ah te rulhut hlo inpek a nih dawn bakah, sikul kal lote chu ASHA-te'n an inah kal chilhin an pe ang a. Target zinga tel si, hemi nia pek hman lohte tan mop up day buatsaih a ni leh dawn bawk a ni.

NDD August 2024 round-ah khan Lunglei leh Hnahthial District chhunga target mi 60,532 aṭangin 97.06% chu rulhut hlo pek an ni a. Kumin NDD February round-a rulhut hlo pek tur atan hian Lunglei leh Hnahthial District chhungah kum 1 leh kum 19 inkar target 51,601 an awm a ni.