4011/2024-2025

Aizawl, the 29th January, 2025: Vawiin chawhnu dar 3:00 khan Durbar Hall, Raj Bhavan-ah 'Ek Bharat Shreshtha Bharat' hmalakna hnuaiah Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan Manipur, Meghalaya leh Tripura State-te pualin Foundation Day lawmna hun a buatsaih. Heng State pathumte foundation day hi January ni 21 kha a ni a, remchan zawkna avangin vawiin hian hman a ni.

Larsap Gen (Dr) VK Singh, PVSM, AVSM, YSM (Retd) chuan kalkhawmte chu Manipur, Meghalaya leh Tripura State-te foundation day puala chibai bukin duhsakna a hlan a. Ek Bharat Shreshtha Bharat kaltlanga State dangte dinchampha inlawmsak thin chuan India ram culture hausakzia leh inpumkhatzia a pholang a ni, a ti a. Prime Minister-in India ram chu kum 2047 ah ram changkang leh intodelh, 'Vikshit Bharat' a hlankai a tum kawngah hmarchhak State-te chuan dinhmun pawimawh tak an luah tih sawiin, "India ram hmarchhak hmun pawimawh tak, thenawm rambuaiin a chim mekte hualvelah kan awm a, hemi karah hian ram inpumkhatna turin mawhphurhna kan neih nasat phah a ni," a ti bawk.

Larsap chuan foundation day lawm tura kalkhawmte chu tun ai zawnga inpawh lehzual nan state dangte hnam ziarang leh nunphungte phur taka hriat chian tum tur leh zah thiam tum turin a chah a. Hmarchhak State-te leh India ram hmun dangte tunhma zawng aia an inpawh ta chu lawmawm a tih thu sawiin, thalaite chu an hawiher tizau deuh deuh turin a fuih a. State hrang hrang aiawh thusawitu leh hnamlam mawi tak tak entirtute fakawm a tih thu sawiin, Vikshit Bharat ni thei tura theihtawp chhuahpuiah a sawm nghal bawk a ni.

He hun hi Pu Zonun Thara, ADC (P) to Governor chuan kaihruaiin program buatsaih chhan a sawifiah a. Manipur Governor Pu Ajay Kumar Bhalla, Meghalaya Governor Pu C.H. Vijayashankar leh Tripura Governor Pu Indra Sena Reddy Nallu te video message thlirho a ni a. Manipur State aiawh Dr. Rebecca Angom, Assoc. Professor, PUC, Meghalaya aiawh Pi Premika Blah, Chief Manager, SBI leh Tripura aiawh Dr. Achinta Badya, Asst. Professor, MZU-te hnen atangin thusawi ngaihthlak a ni a. State 3 zirlai RIPANS atanga tel te'n hnam lam mawi tak tak an entir a ni.

Manipur leh Tripura-te hi kum 1949 khan India-ah betin kum 1956 ah Union Territory pek an ni a. Meghalaya hi tunhmain Assam State hnuaiah awmin kum 1969 khan Autonomous State an ni a. Heng State pahthumte hi January ni 21, 1972 khan North Eastern Region (Re-organisation) Act, 1971 hmangin State puitlina hlankai an ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Ek Bharat Shreshtha Bharat programme kaltlang hian India rama State leh UT hrang hrangte Foundation Day lawmna chu Raj Bhavan, Mizoramah Governor kaihhruaiin  June, 2023 atang khan buatsaih tan a ni.