Vawiin khan New Secretariat Conference Hall ah Pu R. Lalzirliana, Rural Development Minister hovin Mizoram State Rural Livelihoods Governing Body chuan thutkhawm vawi sarihna an nei. Col. Z S Zuala, Parliamentary Secretary leh sorkar mi pawimawh tak tak te he meeting ah hian an tel a ni.
National Rural Livelihood Mission hi India ramah kum 2010 atanga hman tan a niin Mizoram ah chuan 22nd April, 2015 khan hawn tan anih thu leh MSRL hmalak chhoh dan tlangpui Pu R. Lalzirliana meeting kaihruaitu chuan a sawi a. Hemi lam kawnga tun hma atanga hma lo lak tawh that tawk lohna kalsana siam tha in, a tha zawk tur ngaihtuah chunga Ministry of Rural Development Department in kum 2010 atanga an rawn din anih thu leh tunah hian Aizawl leh Lungleiah kalpui mek a ni tawh a, Serchhip leh Kolasib District ah kalpui leh tan mek in kumthar lamah Champhai leh Mamit District lam tinzawn leh mek a niin Mizoram chhung District ah pawh kalpui tum zel anih thu sawiin Central atanga pawisa lo kal te hi thildanga lo pawh pen chi a nih loh thu a sawi bawk.
Pu Lalhmingthanga, Secretary, Rural Development Department chuan vawiin thu rel tura chhawpchhuah te sawifiah in meeting hmasa ( 6th Governing Body Meeting ) a thurel bawhzui dan leh hmalak dan report a sawifiah nghal bawk a ni.
Vawiin meeting hian thutkhawm vawi 6 na thurel tlangpui an pawm a, Central atanga pawisa lo kal Rs 354.50 lakhs chu pawm a niin Serchhip Districta thawhhona tur Letter of Understanding ( LoU) chungchang pawh sawiho in pawm a ni. Thawktu staff te contract tih nun leh na tur a rawtna pawh pawm aniin Kolosib leh Serchhip District a 4 Resourse Block a khua an tuam tawh leh an luhchilh tawh khaw 34 bakah khaw thar 19 a hmalak leh tum mek pawh rem tih a ni bawk a ni.
Mizoram State Rural Livelihoods Mission hian mirethei chhungkua atanga hmeichhia thlang chhuak in chawikan tum in Self Help Group din a ni a,Group khat ah hian mi sawm aia tlem lo an ni tur a ni. He group kaltlang hian retheihna atanga chawikang in sawrkar tanpuina leh Bank loan hmanga eizawnna an lo neih ve theih nan a tanpui thin a ni.
MzSRLM hian 1st December leh 11th December,2015 chuan Mizoram State Assembly Annex Building,Treasury Square ,Aizawl ah te tan Fair neih an tum abuaipui chhoh mek a niin he tah hian Self Help Group 70 vel in dawr hawn an tum a ni.
