Thalaite eizawnna kawng tha siam sak nana Mizoram Sorkar leh United Nations peng pakhat International Labour Organization (ILO) thawk dun in “Mizoram State Skill Development & Entrepreneurship Promotion Policy” an duan chhin (draft) zirhona Workshop-cum- Stakeholders’ Consultation chu vawiin khan I&PR Auditorium-ah LE&IT Department buatsaih in neih a ni. He policy hi Sorkar laipuiin India state hrang hrangte chu eizawnna kawngah hna zawngtuten chhawrtlak thiamna an neih theih nan Skill Development & Entrepreneurship Promotion Policy nei vek tura a tih anga bawhzuina a ni.
Workshop kaihruaitu LE&IT Department Commissioner & Secretary, Pu Benjamina, IDAS chuan National Policy for Skill Development and Entrepreneurship siam ni tawh mahse Sorkar laipui chuan state tin ten an ei leh bar dinhmun mil zela policy hran siam theuh tura a beisei angin Mizoram pawhin hma a lak thu a sawi a. Policy siam tur hian survey huapzau tak leh, ram ei leh bar leh mipui thiamna leh theihna hrang hrang zirchian a tul avangin hemi kawngah hian ILO chu kum 100 dawn sulhnu lo nei tawh an nih avangin zirchianna (research) an neih leh an rawtna te chu rintlak leh hmalak zelna tura behchhantlak tura ngaih an nih avanga Mizoram Sorkar chuan a thawhpui thu a sawi a. An zirchianna en chuan Mizoram “employment’ dinhmun chu a that vak loh thu leh, hemi siamtha tura policy duan chhin chu chu siamthat leh belhchhah ngai lai a awm anih chuan workshop kalkhawmte chu tha taka sawihona hmang turin a sawm bawk.
Vawiin workshop-ah hian ILO Programme Officer Pu Anandan P. Menon chuan Skill Development and Entrepreneurship Promotion Policy chu mihring thiamna hrang hrang (skill set) tih hmasawn a, chhawrtlak mihring thiamna (human resource) tha siam chu a thil tum anih thu sawiin, he hian hnathawh tur zawngtute (job seekers) chauh nilovin, hnathawhtur siamtu (entrepreneur) tha ni tura hmalakna a huap tel a ni, a ti a. Mizoram chu state muanawm a nihna leh ramri dep a awm a nihna te chu hemi kawngah hian thui takin a puih tur thu leh, he skill development policy hi Mizoram Sorkar hmalakna thar NEDP nen pawh a inzulzui thu a tarlang bawk.
Dr. Partha S. Bannerjee, DEFT Director, ILO Consultant chuan Mizoram district zawng zawnga survey an neih hnu a Draft policy an siam chu sawifiahna hun hmangin, zawhna leh chhanna hun neih a ni a. Survey hi phase hnih a kalpui niin, September 2015 atanga tan chu August 2016 khan zawh a ni a. State chhungah an mamawh thiamna nei sa thawktu (skilled) an awm leh awmloh zawhnaah chuan industry (thawktu ruaitu lam) an survey naah 54% chuan an duh khawp an hmuh thu in an chhang a. 23% chuan thawktu awm mahse thiamna an mamawh ang tak an hmuh thinloh thu a chhang in, 22% chuan hna awm mahse state chhung atangin thawktu tur an hmuh ngailoh thu in an chhang thung a ni. Hna zawngtu lam survey naah an zinga 80% chu kum 20-30 inkar an ni a. Graduate hnu a vocational training kal an awm nual bakah graduate hna hmu tawh zingah pawh vocational education eng emaw zir belh duh pawh 34% vel an awm a.
Heng zawng zawngah hian Skill development draft policy-ah chuan hna awm dan leh mamawh mila Vocational Training Providers (VTPs) te kaltlanga zirtirna pek te, zirna standard siam that te, state pum huapa skill development programme hrang hrangte department hrang hrang hnuaia kalpui te chu thlunzawm a “mission mode” a kalpui te, Sorkar laipui hmalakna te nen inthlunzawm te a tel a. Hemi atan hian Public-Private Partnership (PPP) Mode a kal pawimawhna te, training petu turte training pek, “applied and practical training” pawimawhna leh Sorkar hmalakna thar New economic Development Policy nen thlunzawm pawimawhna te tarlan a ni.
Vawiin workshop ah hian LE&IT Department leh Mizoram Sorkar hnuaia Line Department hrang hrangte bakah Vocational Training Providers (VTPs) te leh tlawmngai pawl thenkhat te an tel a ni.
