3696/2022-2023

27th February, 2023: JICA tanpuinaa cheng vaibelchhe 700 senga din tur Mizoram State Super-Speciality Cancer and Research Centre atana loan agreement chu vawiin khan New Delhi-ah India sawrkar leh Japan sawrkar te’n an ziak fel ta.

Loan agreement hi Ministry of Finance, North Block, New Delhi-ah ziah niin India sawrkar aiawhin Pu Rajat Kumar Mishra, Additional Secretary, Dept. of Economic Affairs, Ministry of Finance in a hming a ziak a, Japan sawrkar aiawhin Pu Saito Mitsunori, Chief Representative, JICA in hming a ziah hnan ve thung. Inremna ziahnaah hian Japanese Ambassador to India, Pu Suzuki Hiroshi pawh a awm ve a ni. Mizoram sawrkar aiawhin Dr Jeremy L Pautu, Director MSCI & JICA Project Coordinator leh Dr Hmingthankimi Ralte, OSD, Health Department te an tel bawk a ni.

 He loan agreement chungchang hi sawiin Health Minister Dr. R. Lalthangliana chuan, “JICA Project buaipui hi thil khirhkhan leh hautak tak a ni a, Health, Home, External Affairs, DoNER  leh Finance Ministry te, NITI Aayog te a paltlang  vek a. Ministry leh department hrang hrangte a zawh kual hnua hlawhtlinna kan han hmu thei hi a lawmawmin Mizoram tan thil chhinchhiahtlak tlak a ni” a ti.