3695/2022-2023

Champhai, the 27th February, 2023: Naupai leh nausen kum khat hnuai lamte hrisel zawk nan leh enkawlna tha pek kawnga hmalakna scheme pawimawh tak, Surakshit Matritva Aashwasan (SUMAN) chungchanga Champhai District-a hmalak dan tur relin vawiin chawhnu dar 2:30 khan DC Conference Hall-ah District Bawrhsap, Pu James Lalrinchhana hovin thut khawm a ni.

Pu James Lalrinchhana chuan nu naupai leh naupiangte hriselna ngaih pawimawh chu hriselna nei tura hna hmasa leh pawimawh tak a nih thu sawiin, naupai leh nausente hriselna kawnga hmalakna pawimawh tak SUMAN scheme chu tangkai taka chhawr thiam a pawimawh thu a sawi a. Champhai District-ah hmasawnna dangte ngaihthah chuang lovin hriselna, zirna leh infiamna lamte ti hmasawn tura ngaihtuahna sen nasat zual a nih thu sawiin, hriselna bultan nana pawimawh hmasa Surakshit Matritva Aashwasan (SUMAN) scheme chu Champhai District-ah huapzo leh hlawhtling taka kalpui a nih theih nana inzirtirna neih uar a pawimawh thu a sawi bawk.

CMO Champhai Dr. R. Lianmawia'n SUMAN sawi hawnna a nei a. SUMAN chu dan theih china nau chunga thihna leh nausen thihna awm lo tura hmalakna, Sawrkarin a ngaih pawimawh a nih thu sawiin, naupai leh naupiangte hriselna chu ram changkang leh changkang lo teh nana tehfung pawimawh tak a ni, a ti a. Tangkai taka SUMAN scheme kalpui a nih theih nana theihtawp chhuah tlan a pawimawh thu a sawi bawk.

He hunah hian Pi C.Lalramengi, DPM, National Health Mission, Champhai District chuan Surakshit Matritva Aashwasan (SUMAN) chungchang a sawifiah a. SUMAN chu NHM hnuaia Maternal & Child Health hnuaia program thar a nih thu sawiin, Infant Mortality Rate (IMR) leh Maternal Mortality Rate (MMR) ti hniam tura hmalakna pawimawh tak a ni, a ti a. Hamthatna chu raipuar leh nau neih hnu thla 6 thleng bakah nausen kum khat hnuai lam damlo ten an dawn theih thu a sawi bawk.

Scheme hnuaia hamthatna dawngtute hian hriselna kawnga mamawh angte tha takin man chawi lo in an dawng thei dawn a. District chhunga Health Department hnuaia public health facilities 10 te chu SUMAN Facilitation Centre atan ruat tawh niin, a dangte pawh a tahtawla ruat zel tum a ni a. Hamthatna dawng ten lungawi lohna an thlen theihna tur toll free number 104 leh SUMAN Portal-te siam a ni dawn bawk a. SUMAN kaltlang hian IMR leh MMR te chiang takin report zel a ni dawn a. Damdawiin leh mipuite inkara hnathawktu SUMAN Volunteer pawh ruat theih niin, hamthatna dawngtute chhanchhuah leh an tana thawhhlawk bikte a?angin SUMAN Champion siam a ni dawn bawk a. JSSK, JSY, PMSMA, LaQshya, MAA bakah naute leh nu damlo, in lam thlenga kalchilha enkawlna scheme-te chu SUMAN scheme nena kalkawp zel tur a ni.

Thutkhawmah hian nu in nau a pai laia hriselna kawnga pawimawh zawm ngei ngei turte an hriat theih nana inzirtirna tam zawk buatsaih a tul zia tarlan a ni a. Naupai hma atangin mithiamte leh health department thawktute rawn nachang hriat a pawimawh thu leh, mahni inchik nachang hre lo leh, zawm tur angte zawm lohin vanduaina a thlen theih avanga fimkhur a tul thu inzirtir tam nise tih a ni a. Nausen nuamsam lo leh tlei lo te pawh Damdawiin panpui thuai emaw, mithiamte rawn nghal thuai a pawimawh thu pawh tarlan a ni bawk a. Tui thianghlim in tur pek leh hriselna kawnga mamawhte chhawpchhuah kawnga tanlak ngaihnate pawh sawiho a ni bawk.