3694/2022-2023

Lunglei the 27th February, 2023 : Sawrkar Laipui Minister of State for Tribal Affairs Smt Renuka Singh Saruta chuan vawiin khan zan khat leh ni hnih cham turin Lunglei alo thleng. Kawmzawl Helipad, Lungleiah chawhnu dar 12:35 ah khan rawn tumin Lunglei DC Pi Ramdinliani, IAS leh sawrkar official dangten an lo dawngsawng a ni.

Special Central Assistance to Tribal Sub Scheme cheng nuai 210 kaltlanga Lunglawn, Lungleia Mara Tribal Girls’ Hostel sak thar chu Union Minister of State for Tribal Affairs hian vawiin chawhnu dar 2:30 ah a hawng a ni.

Hawnna inkhawm hi Pu Madhup Vyas, Secretary, Social Welfare & Tribal Affairs, Government of Mizoram kaihhuaiah, Pi Renuka Singh Saruta chuan thu sawiin Mizoram chu a boruak a nawm thu sawiin mizote taihmakna leh chhelna chu fakawm a tih thu a sawi a, kawlphetha ah emaw, tui thianghlim lamah emaw Mizote mamawh leh an harsatna chu a hnenah thlen tura mipuite chahin, a tul ang zela Prime minister hnenah thlen pui a tum thu a sawi a. Mizo mipuite chu ramri depa awm leh cheng an nih anga ramri venghimtu an ni chu lawmawm a tih thu a sawi a, Lunglei pawh khuanu rel sa ram nuam tak ram a nih thu sawi bawkin ram zalenna sualtu Pu Darthawma Renthlei chhungte pawh chibai a buk thu a sawi a ni.

Pi Renuka Singh Saruta chuan Mizoram chu ziak leh chhiar thiam ram a nih anga hmeichhiate dinhmun pawh a that thu a sawi a, vawiina hostel hawn chu lawmawm a tih thu sawiin a tul anga a dang pawh ngaihtuah belh a nih tur thu sawiin hmeichhia ten thiamna kawnga nasa zawka hma an sawn a duh thu a sawi a, Prime Minister pawhin India ram chu ram hmasawn a hlangkai tura theihtawp a chhuah avangin ramdangte nen pawh inpawh taka insumdawn tawnin nasa takin hmasawnna kawng a zawh mek tih a sawi a. Hmeichhiate dikna leh chanvo hriat a tul thu sawiin ram hruaina kawngah pawh hmeichhia ten chanvo nei tura tan la turin kalkhawmte a chah a ni.

Union Minister of State chuan mipui hmasawnna turin scheme hrang hrang Central sawrkar atanga theh chhuah thin a nih thu sawiin scheme thil tum leh awmzia hre chiang lo mi tamtak an awm thin a, chung chu hrechianga hmang tangkai turin theihtawp a tan lak a tul thu a sawi a bawk a ni.

Mara Tribal Girls’ Hostel building hi Phako Builders, Khatla, Aizawl sak niin a project cost hi cheng nuai 210 a ni a. A building hi floor li (4) a sang niin a zau zawng total floor area hi 9100 square feet a ni a, hostel room 14, toilet 11, bathroom 6, dining hall leh facility dang engemawzat a awm a ni.

Hemi hnu hian Union Minister Pi Renuka Singh hian Lungleia Sawrkar Department hotute DC Conference Hall Lungleiah kawm nghalin an hna leh an hmalakna kawng hrang hranga an hmalak dan leh an harsatnate a ngaihthlak sak a. Hemi hnu hian NGO hruaitute a kawm bawk a ni.