Vawiin khan Mizoram State Commission for Women(MSCW) hotute - Chairperson Pi Lallawmchhungi leh memberte: Prof Zokaitluangi, Pi Sylvie Z Ralte leh Pi Lalrosangi te chuan Integrative Unit for Crime Against Women, Aizawl District an tlawh a.
MSCW hotute hian IUCAW a thawk te hi kawmin an duty naa an hmalak dan te bakah harsatna hrang te an zawt a. IUCAW a thawkte chu sawrkar dawr hmasa tur leh chu te chu thuneitu te hnenah lo thlen turin an rawn a, a tul anga Women Commission lam pawn hma an lakpui an tiam a ni. Women Commission te hian Central Women's Jail, Aizawl pawh an tlawh nghal a. Hmeichhe jail tangte, an tan chhan te leh an harsatna te an ngaihthlak sak a.An harsatna an lo sawi tam zawk chu Jail hotuten hma an lakna kal lai mekte an ni a. Mamawh leh harsatna dangte an nei a nih chuan Women Commission-ah thlen turin Hmeichhe jail tang te chu an hrilh a. Commission member te hian jail tangte mamawh chi hrang hrang bak ah Dr Ramenga'n ama sum senga a thawh damdawi te pawh jail tangte hi an hlan a ni.
