Vawiin ni 10.9.2019 (Thawhlehni) zingkar khan Aizawl khawpui chhunga Zirna In hrang hranga NSS Unit-te chuan Aizawl khawpui chhung kawng dung leh AR Ground thianfaiin hun an hmang. College leh Higher Secondary School hrang hrang 28 atangin NSS Programme Officer leh Volunteer 800 chuang zet an thawkchhuak a ni.

NSS volunteer-te chu hmun li (4), heng - Sikulpuikawn, Aizawl West College leh Chanmari kawn (via Zarkawt leh Chanmari kawn (via Electric Veng) ah te chhuakkhawmin AR Ground an panna kawngdung tluana bawlhlawh awmte an chharkhawm a; a huho hian AR Lammual leh a chhehvel an thianfai zui. An bawlhhlawh chharkhawmte chu dumping ground-ah motor hmangin an paih nghal a ni.

 NSS Cell, Mizoram kaihhruaina hian kum hmasa lamah pawh hetiang hian Aizawl khawpui chhung kawng pawimawh te, A.R Lammual te hi vawi eng emaw zat an lo tifai tawh a ni. Heng hmun bakah Bazarpui, Rajiv Gandhi Stadium, Rangvamual (Airport Road) leh Chite lui te pawh an lo thianfai tawh thin a ni.

 He hun hi Sports Minister, Pu Robert Romawia Royte-in a hmanpui a. NSS Volunteers ten AR Lammual an tihfai zawh hian Faina chungchang inzirtirna inkhawm tawi neih a ni a. He programme hi Dr. Zirlianngura, State NSS Officer, NSS Cell Mizoram chuan a kaihruai a.

Minister Pu Robert Romawia Royte chuan Faina chungchanga NSS volunteers te hmalakna chu tha a tih thu sawiin, NSS volunteers te chu ram, khawtlang leh mipuite tana thil tha chauh ti thin, mi dangte entawn tlaka hnathawk thin an ni a, amah pawh NSS-a lo inhmang tawh thin, NSS hnathawh ngaisangtu leh hluttute zinga mi a nih thu a sawi. Sports Minister chuan Mizoram NSS chu kum kal ta chhunga a thlawna thisen peka pakhatna an nih avangin ropui a tih thu a sawi a, chhunzawm zel turin a fuih bawk. Thalai tam tak ruih theih thil laka an fihlim theihna tura venghimtu leh ruihhlo bawiha tangte chhanchhuaktuah NSS chu tang zel se, Faina leh thianghlimna bakah Fitness chungchanga Sorkar hmalakna pawh tawiawma tihlawhtlingtu ni turin a chah bawk.

Sports Minister hian Lammual Gallery, Toilets te leh a chhehvel chu Hnam tan pawha zahthlak khawpa a bal thin chu pawi a tih thu sawiin “Lammual chu fai zawka enkawl a nih theih nan ni 11/9/2019 atangin Sports Deptt-in hma a la nghal ang” a ti.

Vawiin vek hian Mizoram Arm Wrestling Association buatsaih *RC Khuma VIP Tailors Mizoram Arm Wrestling Open Championship 2019 chu Millenium Centre Ground Floor-ah Sports Minister chuan a hawng a. He Championship huaihawttu Mizoram Arm Wrestling Association te leh Mizo Arm Wrestler ten tunhnaia Chhattisgarh-a National Championship-a Results tha tak neia an Champion chu a lawmpui thu sawiin December 2019-a Mizoram State Games lo awm tur atan inbuatsaih turin a chah a, he championship Sponsor-tu RC Khuma VIP Tailors te inpekna a fak bawk.

He Arm Wrestling Championship-ah hian Arm Wrestlers mi 80 chuang an tel a ni.