Vawiin tlai khan Health Minister Dr. R. Lalthangliana'n Seventh Day tlang a Adventist Hospital a tlawh a, Minister hi Dr. ZR Thiamsanga MLA, Health & Family Welfare Board Vice- Chairman leh Prof. F.Lalnunmawia MLA, Horticulture Board Vice-chairman ten an tawiawm a ni.

Hospital enkawltu daktawr te nen inkawmna hun hmangin Health Minister chuan Mizoram sawrkar in Health Care Scheme thar a duang chhuak a, hei hi tihlawhtling tur chuan private damdawi in leh kohhran damdawi in te nen kan thawh ho a pawimawh hle a ni a ti a. He scheme hnuaiah hian chhungkua a hotu ber hmingin inziahluh theih a ni dawn a, ration card a chhungkaw member zawng zawng a huam dawn a ni a ti. Chhungkaw khat dan kum 1 ah Rs nuaih hnih theuh inenkawlna senso a tan a hman theih a, damdawi in lam tan pawh damlo enkawlna bill bat sak ang chi kha a awm tawh dawn lo a ni a ti.

Dr. Biakthansangi, CEO, Mizoram Health Care Society in Health Care Scheme thar chungchang sawifiahin tunhma a Health Care Scheme nen a in anlohna a sawi a. Ayushman Bharat Pradhan Mantri Jan Arogya Yojana (AB-PMJAY) nen a hrangin a kal dawn thu leh Insurance Company hmang tawh lova Health Care Society in Trust mode a kalpui a tum dawn thu a sawi a, Health Care Scheme leh (AB-PMJAY) thar kalpui hunah Tax Deduction at Source (TDS) a awm tawh dawn lo a ni a ti a. Bill tang rei ang chi kha a awm tawh dawn lo a ni a ti bawk. AB-PMJAY bikah hian India rama small state zinga kalpui tha ber kan ni mek a ni a ti a.

Sawrkarin inenkawlna senso tur notified rate a siam a reilote ah tihchhuah a ni dawn a, hei hi sawrkar hnathawk leh Health Care Scheme hian an ring vek dawn a ni a ti.

Dr. Z.R Thiamsanga MLA, Health and Family Welfare Board Vice-Chairman pawhin thu sawiin Health Care Scheme thar hi rintlak a nih thu leh mizote tana chhenfakawm tak tur a ni a ti a. Adventist Hospital chanchin hi ngaihnawm a tih thin thu leh an hnathawh dan leh inenkawl dan te entawntlak a tih thu leh ropui a tih thin thu a sawi.

Adventist Hospital ah hian daktawr 5 an awm mek a ni.