No.2045/2021-2022
Aizawl, 30th August, 2021 : Vawiin khan Directorate of Economics & Statistics Conference Hall-ah Economics & Statistics Director Pu B. Lalrinhlua’n Mizoram Statistical Handbook, 2020 a tlangzarh.

Mizoram Statistical Handbook, 2020 tlangzarhtu Pu B. Lalrinhlua chuan Directorate of Economics & Statistics hi mipuite'n Birth & Death Certificate chauh buaipuiah an hmu fo thin a, amaherawhchu hei hi an hna zinga pakhat chauh a ni a. Hna dang pawimawh tak tak an khawih zingah Mizoram Statistical Handbook chu uluk taka Mizoram sawrkar Department hrang hrangte ram hmansawnna tura an hma laknate leh dinhmunte, Mizoram sik leh sa dinhmunte, zirna, hriselna, sum leh paia Mizoram dinhmunte leh thil tam tak tarlanna a nih avangin a pawimawh hle a, he lehkhabu hi Mizoram sawrkar Department hrang hrangte, Research titute, Plan leh Policy siamtute leh Tourist-te'n an hmang tangkai em em thin a. A chhiartute tana lehkhabu tangkai tak a nih ka beisei a ni, a ti.

Mizoram Statistical Handbook hi kum khat dan zela tihchhuah thin a ni a. Tun tuma tlangzarh hi tihchhuah hmasak ber a nih atanga series 23-na a ni. A chhunga statistics-te hi Directorate of Eonomics & Statistics-in uluk takin Department hrang hrang, NGO, kohhran leh Institution hrang hrang atanga la khawmin, kum kal ta statistics-te nen khaikhin leh rem khawm a nih hnuah, mipuite'n an chhawr tangkai theih tura buatsaih a ni.

Mizoram Statistical Handbook, 2020-ah hian Mizoram hlimthla, kum 2019-20 leh a hma lam tarlan a ni a. Directorate of Eonomics & Statistics chuan kumtinin statistics-te la khawmin, Statistical Handbook chhuah loh kumah Statistical Abstract a tichhuak thin a. Mizoram pum huap survey leh census hrang hrang - National Sample Survey, BPL Survey, Price Survey, Economic Census, Agriculture Census, Census of Government Employees and Workers - te leh a dangte neiin publication a tichhuak thin a. Heng bakah hian kum tinin sector hrang hrang statistics la khawmin Mizoram State Income. Mizoram Economic Growth Rate leh Per Capita Income-te a chhut bawk thin a ni.

Mizoram Statistical Handbook, 2020 tlangzarhna inkhawm hi Pi B. Vanlalruati, Deputy Director Economics & Statistics in a kaihruai a, Pi Lalhmangaihsangi Ralte, Research Officer, Economics & Statistics in technical report a pe a ni.