Vawiin khan Mizoram Supply Accounts Service Association (MSASA) chuan Tourist Lodge, Chaltlang-ah General Conference an hmang a. FCS&CA Minister Pu H.Rohluna chu Khuallian chan changin Conference hawnna a hmanpui a, FCS&CA Director & Secretary Pi M. Zohmingthangi chu Khual Zahawm a ni.

Conference hawnna inkhawm MSASA President Pu Saikhuma kaihhruaiah Minister Pu H. Rohluna chuan Food, Civil Supplies & Consumers Affairs Department chu Mizoram mipui zawng zawng hrawk innghahna a nih avangin department khai dingtu, a hnathawkte chu inthlahdah thei an ni lo, a ti. Dik leh fel taka hnathawh hian ram leh hnam a siamtha a, mipui ten a rah an seng thin a ni, a ti. A bik takin Sales Proceeds felfai tak leh a hun taka zawh hian thil hotea department mualphona tur a sukiang thei a, Supply Centre te pawh a hmunah ngei enfiah ngun leh uluk leh zual turin a chah bawk. Mipuiten beiseina sang tak nen an thlir reng tih hre rengin chhungkua anga thawk ho turin leh a tul hunah chuan sorkar pawh finchhuah fo a, thurawn pawh pe turin Minister hian a chah a ni. Kum 2003-2009 chhunga FCI-a Bill tang cheng vaibelchhe 40.06 chu sanction turin pawm a ni tawh a, 1st installment Rs.57,51,936 chu dawn a ni tawh bakah FCI-in kar hnih dan ang zelah installment-in an rulh fel tur chu Minister chuan Department hnathawkte inpekna leh taimakna vanga tihhlawhtlin a ni tiin lawm thu a sawi a ni.

Khual Zahawm Pi M. Zohmingthangi pawhin thu sawiin MSASA inkaihhruainaah ‘Tih tur leh Mawhphurhna’ (Duties & Responsibilities) chiang taka ziahchhuah a ni chu lawmawm a tih thu a sawi a. An hnathawh zingah Audit hna hi a pawimawh em avangin rilru thianghlim leh dik tak pu chunga thawk turin a fuih a. Mahni hnaa lungawi lo chunga thawk chu a hrehawm thin a, chuvangin sorkar hnathawk tute pawhin service-ah harsatna tawk thin mahse a pawimawh ber chu rilru hnual zawnga kal loh leh hmalam hunah beiseina tha zawk neia rinawm leh hlim taka kan mawhphurhna hlen hi a ni, a ti.

Mizoram Supply Accounts Service Association hnuaiah hian member inziak lut 62 an awm mek a. Vawiiin Conference hawnna-ah hian an member nikum-a boral ta Pu Vanlalsiama, SA, DCSO Office Aizawl West leh kumina boral Pu Malsawmkima, ASA, DCSO Champhai te sunna hun hman nghal a a ni a. Chawhnu lamah an pawl hruaitu thar turte thlanna leh rorel inkhawm neih zui a ni a; an thu ngaihtuah zingah MSASA Draft Constitution sawiho leh pass bakah an Service siamthat chungchang leh hmalakna te a tel a ni.