No.349/2021-2022

Aizawl the 1st May 2021 : Mizoram Presbyterian Kohhran chuan COVID-19 hri leng mek avanga mipuiin harsatna an tawh a theih chen chen a sutkiang nan, a tul apianga hman turin nimin (30.4.2021) tlai khan cheng nuai sawm (Rs. 10,00,000) Chief Minister's Relief Fund for COVID-19 ah an chhunglut.

Mizoram Synod aiaawhin Moderator Rev. Dr. C. Lalhlira chuan Addl. Chief Secretary Pu JC Ramthanga hnenah CM Relief Fund a sum chhunluh tur hi a hlan a ni. Synod hruaitute nen an inkawm naah Addl. Chief Secretary chuan an thilpek avangin lawmthu a sawi a, tangkai taka hman a nih ngei tur thu a sawi a ni. Synod hruaitute chuan nikum lamah theihtawp chhuah a mipuiin dan zawm a kan fimkhur avangin state dang khaikhin in kan dinhmun a that phah thu ni a a lan thu sawiin, kumin hrileng thawh hnih naah pawh mi tupawh in kan theih chen chen a kan fimkhur tlan vek chuan nasa takin awmzia a neih phah ngei an rin thu an sawi a. Sawrkarin theihtawp a chhuahna chungah lawmthu an sawi bawk.