No.2153/2020-2020

Vawiin chawhma dar 10:30 khan Mizoram Secretariat Building no.-1 kawt zawlah Mizoram sawrkar hnuaia zirtirtu pawl (Teachers’ Association) hrang hrang inzawmkhawm , “Mizoram Teachers Federation (MTF)” chuan an hnuaia zirtirtu pawl hrang hrang ten COVID-19 hripui leng dona atana an sum thawhkhawm atanga an lei Ambulance 5 chu Health & Family Welfare department hnenah an hlan a, heng Ambulance te hi district hrang hrang 5 tana hlan niin sawrkar aiawhin Deputy Chief Minister Pu Tawnluia, Health & Family Welfare Minister Dr. R. Lalthangliana, Power & Electricity Minister Pu R. Lalzirliana, Health & Family Welfare Board Vice-Chairman Dr. Z.R. Thiamsanga, MLA leh Horticulture Development Board Vice-Chairman Prof. F. Lalnunmawia, MLA ten an dawng a ni.

Ambulance hlanna inkhawm buatsaihah Health & Family Welfare Minister Dr. R. Lalthangliana chuan thu sawiin Mizoram Teachers Federation (MTF) in Ambulance panga lai mai COVID-19 dona atana Mizoram sawrkar hnena an hlan chu thil lawmawm tak a ni, a ti a. ZMC-a COVID-19 vei enkawl mek te zingah June ni 1, 2020 zana Kolasib District quarantine facility pakhata awm positive hmuhchhuah mi 11 zinga pariat chu an swab sample vawihnih test ah a vaiin an negative vek a, naktuk lam hian ZMC an chhuahsan theih a beiseiawm, tiin hetiang thu lawmawm kan neih mek laia Ambulance kan han dawng leh bawk nen hian, kan boruak tawn hian Zoram mipuite a tidam sawng sawngin ka ring, a ti a. Naktuka Ambulance thar pahnih kan dawn leh tur pawh a sem chhuah dan tur uluk takin ngaihtuah a ni ang a, Mizoram chhim lam district-te tan ruahman tum a ni ang a ti.

Health Minister chuan district hospital hrang hrang ten Ambulance an mamawhzia a taka hmutu a nih thu sawiin, tun dinhmunah motor lei a buaithlakin ngaihtuahna pawh sawrkarin a seng nasa a ni, a ti a. Chief Minister kaihhruaina hnuaiah theihtawp chhuahin ngaihtuahna sen a ni a, COVID-19 hian hrin chhuah a ngah em em a, a tira hriat lawk loh harsatna leh buaipui tur kan hmachhawn belh teuh teuh mai a, hetih laia School Education Minister leh a thawhpui zirtirtute thahnemngaihna a taka lo lang hi Mizoram tan chhinchhiahtlak thil ropui tak a ni, a ti a. swab sample test chungchangah kan khawl neih tharte duh hun huna hman mai theih a ni lova, sawrkar laipui duhdan zawm a ngaih avangin duh angin test chak theih a la ni rih lova, mipuite leh VLTF/LLTF ten phunnawi miahlo leh hriatthiamna nen min dawh thin avangin lawm thu ka sawi a, vawiina thil tha kan tih hian rah tha leh duhawm a hring chhuak zel ang tih ka ring tlat a ni, a ti bawk.

School Education Minister Pu Lalchhandama Ralte pawhin thu sawiin, hun khirh leh harsa tak kan tawh mek lai, kan mangan lai leh sawrkar pawhin theihtawp a chhuah laia hetiang boruak kan tawng hi a ropui a ni, a ti a. COVID-19 do nan Chief Minister’s Relief Fund-ah mithahnemngaiten thawhlawm an thawh a, sawrkar hnathawkte pawhin an hlawh atangin an chhunglut thin a, School Education Department a thawkte pawhin cheng nuaih 150 chuang an chhunglut tawh a, heng an chhunluhte hi an pawisa chuangliam ni lovin an fairel bela lut tur, an mamawh ve ngawih ngawih atangin an chhunglut a ni, a ti. Hripui leng vangin April 1, 2020 a academic session (sikul kumthar) tan tura tih chu thla thum dawn kan khawtlai tawh a, Zirna lam kaihhnawih pawl hrang hrangte nen sawiho a nih hnuah July ni 15, 2020 hi academic session thar atan ruahman chhin a ni a, ruahmanna te pawh State Level Task Force (SLTF) hnenah thlen ni tawhin, he ruahmanna hi kan hun tawng azirin leh SLTF thurawn ngaichang chungin, a tul anga ennawn leh theih a ni, a ti.

Mizoram Teachers Federation (Formerly FMGST) hi School Education Department hnuaia Teachers’ Service Association 10 inzawmkhawm a ní a. School Education Minister in COVID-19 dona kawnga thawhlawm an thawh tawh hnuah hma la leh tura a ngenna ngai pawimawhin Dedicated Ambulance hi Mizoram sawrkarin tun dinhmunah a mamawh ber niin an hria a, MTF a Affiliated Association kaltlangin Zirtirtuten pawisa Rs 42,00,000.00 (Cheng Nuaih sawmli pahnih) thawhkhawm lehin Ambulance -5 hi lei a ni a, heng Ambulance te hi CMO, Aizawl East, Zoram Medical College, Khawzawl District, Saitual District leh Champhai District tana ruahman a ni a. Khawzawl District aiawhin Deputy Chief Minister Pu Tawnluia’n a dawng a, CMO, Aizawl East aiawhin Health Minister Dr. R.Lalthangliana, Saitual District aiawhin Minister Pu R. Lalzirliana, Champhai District aiawhin Dr. ZR Thiamsanga, MLA leh ZMC aiawhin bialtu MLA Prof. F. Lalnunmawia ten an dawng a ni.

GIG Motors neitupa Pu John Lalpeka chuan heng Ambulance thar panga te khalhtu driver theuh ten an hak tur Germany siam PPE set panga theuh Health Department Secretary Pu H. Lalengmawia hnenah a hlan a, a PPE hlan hi SMMMS fabric a siam PPE tha ber chi ni a ngaih a ni.

MTF chuan DC pui tur te, VLTF leh LLTF bakah ramri veng a riah chilh an member te an awm tih sawiin ramri venga duty te tanpui nan Rs 12,00,000/- (Cheng nuaih sawmpahnih) an ruahman tih an sawi.

School Education Department a thawk (Office Staff leh Teacher) ten COVID-19 do nana Chief Minister‘s Relief Fund leh Mizoram sawrkar a tanpuina an pek tawh leh pe mai tura Association ruahmanna siam fel tawh te belhkhawm hi Rs. Nuaih 225 chuang a ni tawh a ni.

Ambulance man atan hian Higher Secondary School Lecturers’ Association (HISSLAM) in Rs. nuaih 6, Mizoram Secondary School Teachers’ Association (MISSTA) in Rs. nuaih 6, Middle School Teachers’ Association (MSTA) in Rs. nuaih 6, Mizoram Primary School Teachers’ Association (MPTA) in Rs. nuaih 6, Mizoram Grant-in-Aid High School Teachers’ Association (MIGAHTA) in Rs. nuaih 6, Mizoram High School Hindi Teachers’ Association (MHSHTA) in Rs. nuaih 3, Mizoram Middle School Hindi Teachers’ Association (MMSHTA) in Rs. nuaih 3, Mizoram Work Education Teachers’ Association (MWETA) in Rs. nuaih 2, Mizoram Adhoc Aided Middle School Teachers’ Association (MAAMSTA) in Rs. nuaih 2, Mizoram SSA Teachers’ Association (MSSTA) in Rs. nuaih 2 an thawh a ni.

Mizoram Secondary School Teachers’ Association (MISSTA) chuan naktuk hian an pawl suma an lei Ambulance thar pahnih chu Health & Family Welfare department hnenah an hlan leh dawn bawk a ni.

Vawiina Ambulance hlanna hun hi School Education Minister Pu Lalchhandama Ralte, I&PR Minister Pu Lalruatkima, Transport Minister Pu TJ Lalnuntluanga, Human Resource Development Board Vice-Chairman Pu L. Thangmawia, MLA, Bamboo Link Road Board Vice-Chairman Pu Ramthanmawia, MLA, Chief Secretary Pu Lalnunmawia Chuaungo leh School Education leh Health & Family Welfare a thawk ten an telpui a ni.