No.3062/2020-2020

Vawiin chawhma khan Mizoram sawrkar hnuaia zirtirtu pawl hrang hrang inzawmkhawm, Mizoram Teachers Federation (MTF) chuan Covid 19 hripui leng dona atan an sum thawhkhawm atangin Rs. 2,00,000 (Nuai hnih), Kolasib District Border Safety Monitoring Team ten a tul apianga hman turin Bawrhsap Dr. H. Lalthlangliana hnenah an hlan.

Mizoram Teachers Federation President Pu Rosanglura Ralte chuan MTF-in Covid-19 do nana hmalakna an kalpui dan thenkhat tarlanna hun a nei a. District hrang hranga ramri a duty-te tanpuina sum an pek dan te, tun hnai lirnghing tuar te hnenah tanpuina an hlan dan te leh a tul apianga hman turin Mizoram sawrkarah Ambulance 7 an hlan thu a tarlang a ni.

Border Safety Monitoring Team hi DC Office, Kolasib hnuaiah ramria Covid-19 do a duty-te harsatna enpui a, vil a, an mamawh hrang hrang ngaihtuah sak tur a din a ni a. Sub-Headquarters YMA, Kolasib nen thawk hovin, BSMT kaltlang hian ramria duty tur indaihlohna hmunah, YMA branch hrang hrang atangin, Vounteer Task Force te siam a ni a, duty inchhawk tur a intirhchhuah thin a ni bawk a ni.

Thilpek inhlanna hunah hian Border safety Monitoring team atangin Pu Vanlalvena, Addl. SP, Kolasib leh Pu C. Liankunga, Sub Hqrs YMA President te an tel a ni.