Vawiin khan Pu Joseph Lalhimpuia, Chairman, Mizoram Youth Commission chuan MYC Training Hall, MYC Office-a Jet Airways Cabin Crew Pre-Recruitment Training nei mekte tlawhin, taima tak leh rinawm taka training nei turin a chah hlawm a; Mizote chu kan pi leh pute hun lai atanga mi taima leh rinawm kan ni a, hei hi thalaiten kan vawng nung zel tur a ni a, hlawhtlinna bul pawh a nihzia Pu Joseph Lalhimpuia chuan a sawi a ni.

MYC Chairman Pu Joseph Lalhimpuia chuan Mizoram thalaite khawvel thar zauh nan Mizoram sawrkar chuan theihtawp a chhuah dawn a ni a tih a sawi bawk a; “Thalaite Khawvel Thar Zauh Ang Aw,” tih hi MYC Au Hla (Slogan) tur a nih thu a puang a. Mizoram thalaiten Mizoramah chauh lehkha zir leh Mizoramah chauh hna thawh kan tumna rilru hi kalsan a hun tawh a; Mizoram State pawnah leh India ram pawn thlenga Mizoram thalaiten lehkha an zira hna pawh an thawh theihna turin Mizoram Youth Commission chuan Mizoram thaliate chu kawng a zawnpui dawn a ni tih a sawi bawk a ni.