Vawiin chawhnu khan Chief Minister Pu Lal Thanhawla chuan Ministry of DoNER leh Mizoram Sawrkar sum  90 : 10 inthawhtawm dan phung a Rs 951.29 Lakh senga sak Government Champhai College Building 7 chu a hawng.

Champhai Government College Building thar te hawngtu Chief Minister Pu Lal Thanhawla chuan college building thar Mizoram hmun hrang hrangah sak chhoh mek a ni chu a lawmawm a tih thu a sawi a. College hmunhma tha tak tak nei mekte intlansiakna tur erawh hmunhma tha neih inhman tangkaisiak, ram leh hnam tana mi pawimawh leh mihlawhtling incherchhuah tam siak te a ni ang a ti.

State thang mekin hmasawnna kawnga ke a pennaah tan la tur leh thahnem ngai ber tura beisei deuh bik te chu nakin lawk a ram leh hnam hmabak ni tur, Higher School chin chunglama zirlaite an ni a ti a. Sawrkarin Quality Education buatsaih tura tan a lak mek laia a tum ber chu export quality thalai mithiam tam thei ang ber a ni a ti. " Infiamna khawvelah kan thangduanga a lawmawm hle a; Health leh Education lamah nasa zawkin tan kan la leh mek a. Heng kan hmalaknaah te hian mipui thlawpna leh sawrkar hnathawkte inpekna avangin hma kan sawn hle a. Khawvelin hmasawnna tehna a hmanlar ber, State Gross Domestic Production ( GSDP) atanga NITI Aayog in a tehnaah Mizoram chu India ram a state thangthaber 4 zingah kan tel a. NITI Aayog chhutlawk dan chuan kan GSDP punna hidouble digit a ni chho dawn a ni.  A chhuanawmin a lawmawm hle a mipui leh sawrkar hnathawkte inpeknaah te lawmthu kan sawi a ni", a ti.

Chief Minister Pu Lal Thanhawna chuan zirlaite chher hriamna leh an hmalam hun buatsaihna a nih angin zirna leh thiamna kawngah bak college campus chu hman a remlo a ti a. Mizoram chhunga Zirtirtute, college zirtirtute tiamin politics ruihchilh leh college-a politics hnuklutte chu Mizoram Sawrkarin a thunun hreh dawnlo a ni a ti a. Zirlaite tan kawng engkimah - incheina, nungchang, khawsak phung, hriselna, ei leh in bakah chhunglam nun ulukna chen in zirtirtute chu entawntur atana beisei an ni a ti.

Zirlaiten hnapetu sawrkar leh kohhran ten hnaruak a nei tam lo tih leh mahni kutkea din tum a pawimawh tih an hriat a tul thu Chief Minister Pu Lal Thanhawla chuan a sawi a. Sawrkar Flagship programme NEDP hnuaia Entrepreneur Development Scheme (EDS) hmanga thalai mahni kutkea dintum - entrepreneur-te tanpuina a kalpui mekte chu zirlaiten an ngaihtuah tan a ngai a ni a ti a. MYC kaltlangin thlaite Civil Services, Military leh a dangah te tamzawk an luh nan hmalak mek a nih chungchangte bakah services sector a thlalai tamtak an luhtheihna tura hmalakna te thalai ten an ngaihven a pawimawh hle ang a ti a. Ram hmasawn chho mekte innghahna chu entrepreneur-te an ni tih hi sawrkar bakah ram tana mithahnem ngai chinte ngaihdan a ni a ti.

Chief Minister chuan,   "Mizoramin Relkawng a neih dawn bakah ramri insumdawntawnna te a puitling chho zel dawn a. Chunga remchanna leh vanneihnate lo dawng thei turin Mizoram thalaite hi thiamna bakah   rilruputhmangahte in lo inherrem leh in lo inpuahchah lawk a ngai takzet a ni", a ti a. Mizoram leh a chhunga chengte tana tanlakna leh tumna tihhlawhtlin kawnga pawimawh ber chu  tumna nei thalaite an ni a ti a. Tumna neilo tan hlawhtlinna tak tak a awm lo a ti. Chief Minister Pu Lal Thanhawla chuan  thalaite tan hlawhtlinna kawngka chu nu leh pa chawimawi, a bikin Mizote tan chuan aia upa zahthiam te a ni a. Nu leh pa chawimawi nan tlailua a awm lo tiin zirlaite chu an zirna bakah Zonunmawi vawngnung turin a chah a ni.

Khualzahawm Pu TT Zothansanga, Champhai North bialtu MLA pawhin he hunah hian thu sawiin Champhaia College tha tak din anih theihna tura hmalaknate  tarlangin College changtlung tak a awm theihna tura Chief Minister hmalakna chu fakawm a tih thu a sawi a. Govt. Champhai College hmasawnna ruhrel tha tak nei awm theihna tura rilru leh ngaihtuahna sengtute hre rengin, College tana tha thawhtute a vang chauha College tha tak din anih theih tak thu a sawi a. College chu mipuitling chherchhuahna hmun a nih thu leh a that leh that loh tehfung ber chu mihlawhtling leh chhawrtlak  chherchhuah tam lamah a ni, a ti a. Zirna kawngah Champhai District chu tan lak thar angaih thu leh sawrkar fawng chelhtu tam zawk hrual chhuak thei tura tan lak angaih thu a sawi a. College zirlaite chu an phaktawkah taima leh rinawm taka zir turin a fuih a, zirlai mai bakah nundan leh khawsak dan thlenga mite entawntlak nih tum thin turin a chah bawk a ni. Sawrkarin zirna In leh zirna tha tak a siam sakte chhawr tangkaia, hmasawn zel tura theihtawp chhuah turin College zirlai kalkhawmte chu a chah nghal bawk a ni.

Vawiina Chief Minister Pu Lal Thanhawla'n a hawn tak buiding 7 te hi - sq.m 1229.60 a lian Multipurpose Hall, sq.m 831.67 a lian Arts & Commerce Building, sq.m 831.67 a lian Science & BCA Building, sq.m 800.05 a lian Administrative & Library Building, sq.m 674.86 a lian Boys Hostel, sqm 100.30 a lian Guest House leh sqm 61 a lian Staff Quarters te niin college building pumpui len zawng hi sqm 4529.15 a ni.

Champhai College building thar hawnna inkhawm hi College Multipurpose Hall-ah neih a ni a. Principal Pu Lalnunmawia'n programme a kaihruai a. Technical Report PWD Project Circle  SE Pu Lalruatkima’n a pe a; Principal thar tur, Assoc Prof. Lalchhanhimi Khiangte in hun a khar thung a ni.Champhai College Building thar hawnnaah hian he college a lo thawk tawhte, zirtirtu lo ni tawhte, District Official te, Alumni hruaitute, zirlai kalchhuak ta te leh sawmbik te an kal tha hle a ni.