Vawiin chawhnu khan I&PR Minister Pu Lal Thanzara chuan MCS probationers (2017 Batch) foundation course training zote thlahna hun Administrative Training Institute, Aizawlah a hmanpui.
Pu Lal Thanzara chuan MCS Officer-te chu sawrkar tan leh mipui tana hna an thawhna kawngah mahni in vawn, rinawm, an thawhpuite mai bakah mipui leh anmahni dawrtu laka rilru dik put leh an thawhsaka te tana thahnemngaih a pawimawhzia a sawi a. Hna thiam, thawh chak leh taimak te a pawimawh a, chung zawng zawng chungah chuan sum leh pai chung changa rinawmna te, mahni hnaa rinawmna te, mahni mimal hamthatna aia sawrkar tana thahnemngaihna te a pawimawh ber zawk a ni, a ti a. Kan hna te hi tlawmngaih thila kan thawh tur a ni lova, kan kova tla, kan bat a ni, I&PR Minister chuan a ti. MCS te chu sawrkar khalh kaltu leh khalh kal theitu an ni a, nakin thleng pawha ram tana chhinchhiahtlak thawh theihna hmunah an awm dawn tih hrilhin an service chhungin ram tana chhawrnahawm tur rotling hnutchhiah ngei turin a chah a. Sawrkar hna an thawh dan, an awm dan leh ngaihtuahna a dik em tih inchhut let fova, ngaihtuahna diklo put chhoh palh theihna lakah in veng fimkhur turin I&PR Minister Pu Lal Thanzara chuan MCS probationer-te a chah a ni.
MCS probationer 2017 batch-te hi mi pariat, hmeichhia pahnih leh mipa paruk an ni a. Training-a ti tha ber, Best Probationer atan Neng Thianlala thlan a ni. An training hian kum khat chhung awhin March 1, 2017 khan bul an tan a. Hmun hrang hrangah attachment-te neiin an training chhung hian Guwahati, Bengaluru, Mysore, Kanyakumari, Chennai, Rajasthan leh Delhi te an tlawh. Mizoram chhunga District hrang hrang bakah Aizawl khawpuia office pawimawhah te attachment neiin an ni ho hi MCS lak thar te zingah MCS Cadre Training Rules 2016 hmang hmasa ber an ni.
Valedictory Programme ah hian ATI Director Dr Ankita Chakravarty chuan kalkhawmte lawmna thu sawiin Course Coordinator Pi Angela Zothanpuii’n training report a pe a. Trainers-te aiawhin Pu Neng Thianlala leh Pu Lalrinsanga Hnamte te chuan thu an sawi a ni.
