Vawiin khan Tourism minister Pu. John Rotluangliana chuan Tourism Department hnuaia hmalakna pakhat Convention Centre, Reiek-ah a hawng a, Tourist resort panna kawngah he hmun tlawhtute hmuh tura siam, Isua lim a hawng bawk.

Tourism minister Pu John Rotluangliana chuan Mizoram hi sik leh sa chungchangah pawh hmun nuam tak ani a Tourism Department hian kan ram hi ramdang hmaah nasa zawka zin mite hip thei turin a pholang chho meka, zin mite hip thei tur leh Mizoram mipuite tan pawh a tlawh chakawm turin hmun hrang hrangah project a kalpui mek ani, a ti a. Mizoram hmun hrang hrangah Homestay scheme pawh tih hlawhtlin chhoh mek anih thu leh hun reiloteah Sky-walk leh Rope-way te pawh kan neih thuai a beisei thu a sawi. Reiek khua chu Tourist hmun pawimawh tak anih avangin a khaw mipuite chu zin mite dawnsawnna kawngah rilru zau put a tul thu a sawi a, Reiek khaw chhunga Tourism department in hma anlo lak tawh te chu neitu chan chang a, uluk taka a hmunhma enkawlpui kawngah pawh khawtlang hruaitute chu thawpuiah a sawm nghal bawk.

He huna Khual Zahawm MLA Pu Lalrobiaka chuan Convention Centre chhawr tangkai thei ber tu chu a khaw mipuite kan ni a, duat tak leh uluk taka enkawl hi kan mawhphurna theuh a ni a ti. Pi Esther Lal Ruatkimi, Commissioner & Secretary, Tourism Department chuan Tourism hi kan ram chhung a sum lengvak ram pawna chhuak mai tur ven nan leh zin mite atanga sum hailuh na tura hmanraw tangkai tak anih thu a sawi a, department hmalakna hrang hrangte a hlawhtling chho zel chu lawmawm a tih thu a sawi bawk.

Reiek Tourist Resort a Convention Centre sak nan hian cheng nuai 255.17 hmanral a ni a, a sakna tur sum hi Northern Eastern Council (90%) leh Mizoram sawrkar (10%) in intum semin, Lushai Engineers, Ramhlun Aizawl chuan a sak hna hi October 2015 ah an tana, February 2018 khan an sa zo a ni. Convention centre hi mi 250 leng tura sak niin motor 10 leh two-wheeler 20 lenna garage a awm bawk a, stage leh green room te awm in solar street light 8 a awm bawk a ni.