Mizoram Sorkar leh United Nations Development Programme (UNDP) tangkawp chuan Mizorama thlai leh thei thar (horticulture products)-te state pawna hralhchhuahna tur market zawn runpui nimin (13.9.2016) khan Aijal Club-ah company 12 leh state chhunga producer pawl hrang hrang sawmin “Buyers-Sellers Meet” a buatsaih a. He hunah hian Finance Minister Pu Lalsawta chu khuallian niin, Horticulture Minister Pu PC Lalthanliana a tel bawk a, hun hi Chief Secretary Pu Lalmalsawma’n a kaihruai a ni.
Minister Lalsawta chuan Buyers-Sellers Meet buatsaih chu Mizoram hmasawnna lamtluang zauhna tur hmanrua anih thu sawiin, he inkawmhona hian Mizoram kuthnathawktute tan malsawmna a thlen ngei a beisei thu a tarlang a. Insumdawntawnna changtlung tak nei tur chuan Mizoramin hlawm tam tham tak hralhchhuah tur kan neih a tul thu tarlangin, company-te chuan an mamawh zah leh ‘process’ hnu nge tharlam taka lei an duh zawk tih thlengin sawifiah tura a duh thu te, hralhchhuah tur neite chuan company-te mamawhna phuhruk thei tura nasa zaka hmala zel tur te in a chah a. Industries lamah state dangte nen khaikhin in hnufum zawk mah ila theihna kan neihna te hi ram hmasawnna hnarkaitu a siam turin tih tak takna nen Sorkar leh kuthnathawktute tanho a pawimawh thu a sawi a. Ei leh bar ah Mizoram chu mahni eikhawp thawkchhuak mai nilovin sumsumdawnna hmunpui ah kan inhlangchho thuai thei ang, khuallian chuan a ti a ni. UNDP in consultant atan a rawih Yes Bank leh Mizoram Sorkar tangkawp buatsaih “Potential Opportunities for Horticulture Produce in Mizoram” chu khuallian hian a tlangzarh nghal a ni.
Horticulture Minister Pu P.C.Lalthanliana pawhin thu sawiin, Mizoram thlai leh theirah te chu nihphungah tunlai khawvelin a ngaih pawimawh em em, chemical hlauhawm leh heavy metal tello “organic” an nih mai bakah uluk taka tunlai thiamna hmanga zirchianna neih hnu in variety tha zawk leh tam zawk tharchhuak tura Sorkar puihna nen kuthnathawktute tan hma an lak thin thu a tarlang a. Insumdawn tawnna tha tak nei tura kuthnathawktute leh company ten inthlunzawmna an siam theih chu Mizoram Sorkarin a duh thu leh, hmabak awm zel turah pawh theihtawp a chhuahpui tur thu a sawi a ni.
Chief Secretary Pu Lalmalsawma kaihruaina hnuaiah Mizoram horticulture product-te hralhchhuahna tur market nei thei tura potential buyer company 12 sawmchhuah te leh hralhchhuah tur nei pawl panga thlan te bakah a kaihhnawih Sorkar department hrang hrang hotute chuan chipchiar taka inkawmhona an nei a. “Potential buyer” sawm chhuah company te chu Coca Cola, Louis Dreyfus, Field Fresh Foods Ltd., Organic India, Sunflag Agrotech, Sresta Organic, Omnikan Earth Science Pvt. Ltd., Suminter India Organics, Access Development Services, Haldiram, Keventer Agro leh Paras Spices niin, Mizoram nena insumdawntawnna an neih theih nan heng - sawhthing, ai-eng, hmarcha, serhlum, grape leh kuhva te an ngaihven thu an sawi a. Heng bakah hian hralhchhuah tur dang Mizoramin a neih – sapthei, balhla, lakhuihthei, dragon-fruit, iskut leh anthurium chungchang te sawiho a ni bawk. “Seller” lam atangin All Mizoram Farmers; Union (AMFU), Reiek Multi Farming Cooperative Society, Zoram Mega Food Park Pvt. Ltd., Community Development Action and Reflection (CDAR) leh Mizoram Cooperative Apex Bank aiawhte an tel a ni.
Yes bank leh Horticulture Department atangin Mizoram a heng horticulture products tharchhuah dinhmun leh insumdawntawnna atan a hlawk theihna chungchang presentation an pe a. Hun hi Pu P.L. Thanga, IAS (Rtd.) NIB Vice Chairman in lawmthu sawiin a khar a ni.
