3rd State State Anti- Tobacco Day pualin vawiin khan Kolasib DC Office tualzawlah leh Government Kolasib College-ah hun hman a ni a, Pu H.Lalengmawia, IAS Deputy Commissioner, Kolasib in a hmanpui.

Kolasib DC Office tualzawla hun hman hi Dr.C.Vanlalhlimpuia, Secretary, Anti-Tobacco Squad, Kolasib District-in a kaihruaiah hian, Pu H.Lalengmawia chuan thianghlim hi Pathian anna a ni a, taksa leh rilru a thianghlim ve ve tur a ni tiin, taksa tithianghlimlo bertu pakhat zuk leh hmuam do kawngah tan kan lak zel angai a ni a ti. Dan phalloh cigarette man tur tam tak a la awm chu pawi a tih thu sawiin,sumdawngte pawh man kher ngailo a zuarlo turin a chah a ni.

Vawiin 3rd State Anti-Tobacco Day puala DC Office tualzawla hun hmanah hian dan phalloh a cigarette zawrh te tuia leih zawpin tih riral a ni a. Cigarette tih riral zat hi Foreign Cigarettes – 75 cartons + 10 packets leh Churut 84 bundles a ni a, Rs.43,800/- hu a ni. Dan phalloh cigarette te hi a siamtu company hming, a chhunga zawm zat, a nihna etc te Legal Metrology Act, 2009 Legal Metrology (Packaged Commodities) Rules, 2011 danin a phut ang zawm lo leh chhiah pelo bakah Cigarettes and Other Tobacco Products Act in a phut anga hriselna a khawih pawi theih dan tarlang lo te an ni.

3rd State Anti-Tobacco Day pual hian vawiin vek khan Government Kolasib College-ah zuk leh hmuam –in taksa a khawih pawi dan leh rilru ngaihtuahna thlenga a nghawng dan te inhrilhriatna hun hman a ni a, he hunah hian District Bawrhsapin telpui lehin zirlaite fuihna hun a hmang a ni.