Vawiin chawhma Dar 10:30AM khan Siaha DC’s Conference Hall-ah Pi Harleen Kaur IAS, Siaha District Bawrhsap leh Chairperson Anti- Tobacco Squad ni bawk hovin 3rd Mizoram Anti- Tobacco Day hman a ni. He hun hmanna-ah hian thusawiin Pi Harleen chuan, Vaihlo leh a kaihnuai thil eng chi pawh tih hnu a bansan aiin tih loh hi a him ber fo a ni, a ti a. Kan fa te leh kan nau te hnena zuk leh hmuam tih lo tura zirtir dan tha ber chu mahni tih ve loh hi a ni, a ti bawk.

Vawiin Anti- Tobacco Day hmanna-ah hian Pu ZT. Vawra Hmar, District Consultant, NTPC chuan Siaha District Tobacco Control Cell te hmalakna report a pe a. Report-ah chuan 1st August, 2015 -1st August, 2016 inkar khan School 110 ah Awareness Programme hman a ni a, Sensitization leh TCC (Tobacco Cessation Clinic) training vawi 12 neih a ni bawk.. TCC hnuaiah hian Clients 309, mipa-168 leh hmeichhia-141 an nei a, bansan (Quit) hi 7.59% an awm bawk. Anti- Tobacco Squad te hian vawi 42 Drive neiin, COTPA dan Sec-4,5,6 leh 7 te hmangin mi 263 man tawh an ni a, pawisa chawitir tlingkhawm chu Rs.14,940/-a ni a. COTPA dan hnuaia Meizial an man te chu a vaiin 275 Cartons leh 96 Packets a ni a,a Market Value-ah chuan Rs.1,05,050/- man a ni.

Anti- Tobacco Day Observance Programme tawi hmanzawhah hian DC Conference Hall kawtah Anti- Tobacco Squad te Meizial mankhawm te chu Pi Harleen Kaur hova tuia chiah chhiat an ni. Vawiin Programme tlip nan NCC,Government High School ten “Tobacco Free Generation Cleanliness Rally” DC Office Complex atangin Bus Station, New Colony Vaih thleng an tlan bawk.