170/2024-2025 

Aizawl, the 12th April, 2024: Vawiin khan Mizoram Truck Owners’ Association hotute chuan Governor Hari Babu Kambhampati chu Raj Bhavan-ah an hmu a, Governor hnenah hian an harsatnate an thlen a ni.

He hunah hian Mizoram Truck Owners’ Association hotute chuan Bairabi rel station-a rel lut leh chhuak mumal lo tak avanga harsatna an tawh chungchangte chu Governor hnenah an thlen a. MTOA hruaitute chuan member 150 vel an nih thu sawiin an pawlah hian truck 300 bawr an inziaklut tih an sawi.

Bairabi railhead atanga Mizoram hmun hrang hranga buhfai dahkhawlna hmunah Buhfai phurh sak turin FCCI Contractor-te hnuaiah an inhlawh tih an sawi a. Tun dinhmunah rel luh leh chhuah dante a mumal lo hle a. Hei vang hian MTOA hruaitute  te chuan Truck neituten  harsatna nasa tak an tawk mek tih Governor hnenah hian an thlen a, Bairabi Station chuan hmunhma, hmanrua leh thawktute a neih that tawk loh avangin hmun chep takah truck tam tak inhnawhkhawm a ngai tih an sawi. Hei vang hian a hun takah bungruate an hlan  thlak theih loh phah thin a ni an ti a. He an harsatna te sutkian a nih theih nan Governor chu Railways hotute leh FCCI hotute biaksak turin an ngen a ni.

Governor chuan MTOA hruaitute thu thlen leh an harsatna tawh chungchang te a ngaihthlak hnuiin a tul anga hmalakpui a tum tih a sawi a, MTOA lam pawh General Manager, North-East Frontier Agency (NEFA), Guwahati chu hmu turin thurawn a pe a, recommendation letter a ziahsak nghal bawk a ni.