North Eastern Council (NEC) bultumin Department of Planning & Architecture, Mizoram University leh Cane & Bamboo Technology Centre, Assam tangkawpin vawiin khan Mizoram University Auditorium ah Mau hman tangkai dan sawihona “Seminar on Innovative Bamboo Structures” an buatsaih a, Tourism Minister Pu Robert Romawia Royte chuan khuallian niin a hmanpui.

Khuallian Pu Robert Romawia Royte chuan Sawrkar in mau a ngaihpawimawh thu a sawin a, Mizorama mau kan neih sa te a tangkai thei ang bera hman tum a nih bakah Mizorama mau aia lian leh chang tha zawk pawh ram dang atanga lak luh tum a ni a ti. Mizoramah tualto mau chi hranghrang engemawzat kan nei a, hei hian mau te hi tangkai taka kan hman atan Pathianin a lo dah a ni tih a rin theih a ni a ti a. Mau ‘Rap In’ a chen hi retheihna entirna ah kan ngai niin ahriat a, hetiang rilru hi kan put reng chuan mau hlutna leh tangkaina kan hrethiam ngai dawn lo a ni a ti a, mithiam zawkte leh ram changkang zawkte chuan mau that zia hi hria in kawng hrang hrangah an hmang tangkai em em a, hei hi kan inzirtira kan inhrilhhriat tam a tul hle a ni a ti bawk.

Mizoram University chu India ram University zingah a naupang ber pawl ni mahse hma chak takin a sawn a ni a ti a, UGC in University tha a thlan chhuah zinga 17-na dinhmun an hauh pha leh NAAC Accreditation result hnuhnung bera Grade ‘A’ an hmu thei chu lawmpuina hlanin Mizoram University in Mizoram hmasawnna atana tanpui an mamawhna apiangah a tih theih chin a awm chuan theihtawp chhuah zel a inhuam thu a sawi bawk.

Industrial Development Board Vice-Chairman Pu C. Ramhluna pawhin thu sawiin Mizoram ah mau chi hrang hrang 35 chhinchhiah tawh a ni a, Mizoram chhung hmun za a 30 lai hi mau hmun a ni tiin a bik takin thingtlang lamah mau hi kawng chi hrang hrangin hman tangkai a ni a ti a. Mau thatna leh tangkaina hi kan hriatchian a pawimawh hle tih sawiin thingzai thlak tu atan pawh a sitawm loh a ti a. Mau hi forest product anga chhiar a nih tawh loh thu leh Horticultural product anga chhiar a nih tawh zawk thu a sawi a. Mizoram mau te chu an pan bakah an nem deuh a, rit dawl zo tak tak tur mau chang tha leh chhah tha Mizorama lakluh tum a nih thu a sawi bawk.

Prof. KRS Sambasiva Rao, Vice-Chancellor, Mizoram University pawhin Seminar kaltlangin Bamboo Architecture pawimawhzia kan hriatbelh phah ngei a beisei thu a sawi a, Mizoram chum au chi hrang hrang nei tha an ni a, tun aia tangkai lehzuala hman a nih ngei a beisei thu sawiin Mau atanga siam leirawhchan “Bamboo bricks”  industry chu Mizoramah a hlawhtlin theih a beisei thu sawiin hei hi khawvel hmun hrang hrangah Insakna hmanraw tangkai leh tha a nih thu a sawi. Vice-Chancellor chuan Mizo thalaite tan zirna kawng hrang hrangah hma an lak reng thu a sawi a, kumin chhung ringawt pawhin Department thar pali- Tourism & Hospitality Management (MBA), Clinical Psychology (M.Sc.), Industrial Chemistry (M.Sc.) leh Food Technology (M.Sc.) hawn thar a ni a ti a, Department thar tangkai tak tak tur din belh zel tura ruahmanna siam mek a nih thu a sawim bawk. Hei bakah hian Football Ground, Futsal Ground pahnih, Sports Auditorium etc. te din turin ruahmanna siam mek a ni a ti a. Tourism Minister Pu Robert Romawia Royte chu  Mizoram University campus chhunga Tourist Lodge sa turin a ngen bawk a ni.

 Vawiin sawihona hi hun hnih a then a ni a, hun khatna ah “The Syructure of Bamboo : Its Mechanical and Engineering Properties” thupui hmanga Mr. Nakul Nanda Malsom, Consultant CBTC paper buatsaih leh “Energy Efficient Bamboo Structure for Seismic Area and Eco-Tourism Camps” thupui hmanga Mr. Amitav Sill, Scientist & Officer Incharge (IPIRT) te paper buatsaih zirho a ni a, hun hnihna ah “Bamboo: Theory & Demonstration” Mr. Anjal Goswami, Manager (H&C), CBTC leh “Introduction to bamboo Applications for Industrial and Housing Materials” thupui hmanga Mr. Pulak Kumar Mandal, Manager (T) CBTC te paper buatsaih zirho leh sawiho a ni.