February ni 26 hian India ram zirna in hmun hrang hrang 50-ah Information Technology (IT) zirlai sing chuang zetin AppFest an hmang dawn a, Windows Operating System-a hman theih tur software chi hrang hrang siam chhuak turin beihpui an thlak dawn. Mizoram University pawh zirna in thlanchhuah 50 zingah telin MZU a IT Department chuan a tul apiang a buaipui mek a ni.

AppFest-ah hian Microsoft chuan zirlai telte hnenah an hman tur software te pe in Windows Store-a an software siamte dah theihna tur registration code te an pe dawn a. Zirna atana hman tangkai tur chi software te, games chi hrang hrang te leh mipui nawlpui tangkaipui theih tur software siamchhuah te chu an tum ber a ni ang. He huna tel te hian an software siam te Microsoft kaltlanga phochhuahna hun remchang an neih theih dawn bakah Microsoft mithiamte kaihhruaina hnuaiah hriatna tam tak an neih belh ngei beisei a ni bawk.

Microsoft company hi kum 1975 khan USA ah din a ni a, khawvel pumah computet sofware siamtu lian ber tia chhal ngam niin khawvel hrang hrangah a inzarpharh zau hle a. India ramah pawh kum 1990 khan bu rawn khuar ve in Microsoft India chu din a lo ni ve leh ta a ni. Tunah hian Microsoft India chuan heng khawpui pakua - Ahmedabad, Bangalore, Chennai, Hyderabad, Kochi , Kolkata, Mumbai, New Delhi leh Pune ah office a nei mek a ni.