Vawiin khan a vawikhatna atan Mizoram puma College Principal-te Conference hmasa ber chu Directorate of Higher &Technical Education Conference Hall, Mc Donald Hill, Aizawl-ah Higher &Technical Education Commissioner leh Secretary, Pu K Lal Nghinglova hovin an hmang.
He conference-ah hian Mizoram College- a zirna hmasawnna tur thu pawimawh tak tak an sawi hova. Chung zingah chuan zirlai ten saptawng an thiam lehzual theih nan Classroom chhungah zirtir nan saptawng chauh hman tawh nise tih te, zirtirtu ten College-ah incheina thianghlim leh zahawm tak inbel thin nise tih te, College- te an intihchak tawn theih nan College hrang hranga Faculty Member ten College dangte tlawh (visit) thin ni se tih te an rel a. Heng bakah hian Higher & Technical Education chung changa sorkar laipui scheme thar RUSA (Rashtriya Uchatar Shiksha Abhiyan) te, Govt Hrangbana College leh Govt Hnahthial College-a Community College din tur chung chang te, skill development chung chang te leh NAAC Accreditation chung chang te an sawiho a ni.
Conference-ah hian Mizoram chhunga sorkar, deficit College leh Institution Principal zawng zawng te bakah Directorate of Higher &Technical Education-a officer te an tel a ni.
