Vawiin chawhma dar 10:00 khan Khrishi Vigyan Kendra (KVK) Mamit District, Lengpui bul tumin loneitute tan I&PR Conference Hall, Mamit ah Scientific Advisory meeting neih a ni.

Meeting kaihruaitu Pu C. Lalniliana, Director of Agriculture (R&E) chuan SAC meeting hi KVK hmunpui theuh a neih thin tur a nih laiin District khawpui bera a chang changa neih hi District chhunga loneitute tan a beng var thlak a tih thu a sawi a. Taima tak leh ngun taka Mamit District Agriculture in hma a lo sawn theih nan Scientific Advisory Committee member te chu an ngaihtuahna seng turin a ngen.

Pu Vanlalhruaia Hnamte, Programme Coordinator, KVK Mamit District Lengpui, Member-Secretary, Scientific Advisory Committee ni bawk chuan kum 2012-2013 chhunga KVK hnathawh hrang hrang te a tarlang a. KVK hnathawh te hi a pawimawh em em rualin a rah chhuah te hi Development Department dangte hnathawh anga hmuh nghal mai theih a ni lova, KVK centre hrang hranga Agriculture lama thiam bikna nei ten englai pawhin Agriculture Technology thar te hi kan ram sik leh sa milin a tih ve theih em tih hi ngun takin an thli thlai reng a ni a ti.

He meeting-ah hian Agriculture and Allied Sector a District Officer te leh an aiawhte an tel tha hle. Mamit District a Horticulture, Plant Protection, Fisheries, AH & Vety leh Agro-Forestry lam tih hmasawnna tur a On Farm Trial leh Front Line Demonstration ruahmannna hrang hrang te leh hmachhawpte thlirho leh pawmpui a ni.