Vawiin chawhma dar 9.30 khan Mizoram University (MZU) chuan Tanhril-a an campus-a Auditorium-cum-Multipurpose Hall-ah Convocation tum 8-na an hmang a; he inkhawmah hian Prof. Harsh K. Gupta, Member, National Disaster Management Authority chu khuallian a ni.

Prof. Harsh K. Gupta chuan zirna peng hrang hranga degree dawng tharte chu duhsakna hlanin, “Mizoram University hian zirna peng hrang hranga kan ram thalaite tuihalna a phuhruksak mek a; Mizoram leh kan ram pum pui hmasawnna tura he university-a inrelbawlna lam enkawltute, zirtirtute leh zirlaite thahnemngaihna hi a chhuanawm tak meuh a ni” a ti. Prof. Harsh-a chuan India ramin tunhnaia science lama hmasawnna rahbi pahnih a neih leh amah ngei pawh a inhnamhnawih ve-na chanchin sawiin, kum 2004-a Indian Ocean-a Indian Tsunami Early Warning System (ITEWS)bun fel a ni ta leh kum 1983-84 chhunga Antartica hmuna station nghet bunfel a ni chu thil ropui tak a nih thu a sawi a. “Antartica leh India khawmual inkarah hian thliarkar te tak te te bak a awm loh avangin Antartica hian Indian Ocean huamchhunga sik leh sa dinhmun a thunun a; Indian Ocean-a sik leh sa dinhmun hian India ram sik leh sa te, monsoon-te a nghawng lehchhawn avangin kan ram tan Antartica chanchin hriatchian hi a pawimawh a. Kan thlaichin leh thlawhhma thar that dan thlengin a nghawng a ni” a ti.

Prof. Harsh-a chuan National Disaster Management Authority (NDMA) hnapui ber chu chhiatna liantham a lo thlen thulha nunna te, in leh lo, bungrua leh eizawnna a nghawng nep dan tur ruahmanna siam a nih thu a sawi a. Lirnghing hian chhiatna a thlen nasa ber a; kum zabi 21-na chhunga lirnghing leh tsunami avanga thihna thleng tawh hian kum zabi 20-na liam ta chhunga thi zat kha a khum tawh hial a ni, a ti. Lirnghing kawng – Himalaya tlang atanga Arunachal Pradesh thlenga inzam hian lirnghing magnitude 8 emaw, a aia na emaw a thlen thei reng a; nimahsela, chutiang taka lirnghing na chu kum 1950 hnulamah a la thlen leh tak loh avangin kan lungmuang sual thei a ni, Prof. Harsh chuan a ti bawk. NDMA chuan kum 1897-a Assam rama lirnghing na tak, Mizoram pawh nasa taka sawi danglamtu ang kha a lo thlen leh thulha a nghawng nasat dan tur zirchianna pawh a buatsaih mek thu a sawi bawk. Prof. Harsh chuan MZU hnuaia zirna peng pakhat- Earth Science and Natural Resource Management - chu lir a nghin thut pawha chhiatna kan tawh nep theihna tura mipuite hnena zirtirna pekna hmanraw tangkai tak a nih theih ngei a rin thu pawh a sawi bawk a ni.

Vawiina MZU Convocation hi Vice-Chancellor Prof. R. Lalthantluanga chuan kaihruaiin, zirlaite zingah anmahni ngei lo kal thei - mi 154 hnenah Bachelor’s Degree te; mi 229 hnenah Master’s Degree te; mi 16 hnenah MPhil te; mi 17 hnenah Phd te a hlan a ni; a hmuna lokal remchang lo zirlai 2200 an awm bawk a ni. Hengte bakah hian subject hrang hranga a titha ber mi 25-te hnenah Gold Medal hlan an ni bawk a ni. MZU hi kum 2000 kumah a lo ding tan a; tunah hian a hnuaiah school 8 leh Department 30 a awm mek a ni.