Vawiin khan Pu Lalthangliana Varte, Commissioner of Taxes chuan Commissionerate a officers te hnenah laptop VATSoft tangkai taka an hman theihna turin a sem.

Taxation Department, Govt. of Mizoram chuan October 2010 atanga bul an tan tax administration atana computerization project an kalpui mek chu tunah hian hna 80% vel zawh tawh a ni a. He project hi National eGovernance Plan (NeGP) guideline leh duh dan anga sumdawng ten awlsam leh remchang zawka sorkar service an dawn theihna tur leh sorkar an dawr theihna tura duan a ni.

Tax administration atan hian software changkang leh changtlung tak VatSoft an siam a. He project atan hian Central sorkar Mission Mode Project Commercial Tax (MMP-CT) atangin fund 6.91 crore an hmu a. Mizoramah internet connectivity a that tawk loh avangin additional connectivity atan an dil angina kar hmasa mai khan Central sorkar-in V-Sat leina atan additional fund 26.25 lakh a rawn pek belh leh bawk.

He project atana Taxation officer ten tangkai taka an hman atan laptop 45 leh desktop 132 lei a ni a. Tunah hian khawl tharte hi Taxation office tinah bun mek a ni. Sumdawng ten department an dawr thinna zawng zawng hi office kal kher ngai lovin Taxation website www.zotax.nic.in atang hian online in Taxation department an dawr thei tawh ang.