2518/2024-2025

Dated Hnahthial the 15th October, 2024: Vawiin chawhma khan Department of Biotechnology, Government of India sponsored Biotech Krishi Innovation Science Application Network Project, DBT Biotech Kisan Hub: Mizoram University hmalaknain Farmers' Training programme, KVK Hnahthial training hall ah buatsaih a ni a. District chhunga khaw thenkhat - Darzo, Tuipui D, Cherhlun, South Vanlaiphai, Thiltlang leh Hnahthial a kuthnathawktu te nen neih a ni. He hun hi Pi Rita Lalnunmawii Pachuau, District Bawrhsap chuan khuallian niin a hmanpui.

Training hi Pi Zosangliani Varte, SMS Horticulture chuan a kaihruai a. Khuallian, District Bawrhsap Pi Rita Lalnunmawii Pachuau chuan Hnahthial District a cheng te chu mi taima leh hnathawk nasa an nih thu sawiin,  kuthnathawktuten hlawk zawka buh leh thlai an thar theina atana training pawimawh tak KVK Hnahthial leh Mizoram University tangkawpin an buatsaih  thei chu lawmawm a tih thu leh hlawkpui nana hmang ngei turin kuthnathawktute pawh a chah bawk a ni.

He hunah hian Dr Henry Saplalrinliana, Senior Scientist & Head, KVK in kalkhawmte lawmna thu a sawi a. Prof Rambir Singh, Department of Horticulture, Aromatic & Medicinal Plants (HAMP), Mizoram University; Zosangliani Varte, Subject Matter Specialist (Horticulture) leh Dr Lalngaihawmi Subject Matter Specialist (Plant Protection) KVK ten training an pe a ni. Training ah hian kuthnathawktute hnenah thlai enkawlna damdawi hrang hrang te bakah thlai chi leh thlai tiak te pek nghal an ni bawk ang.

He project hnuaiah hian Mizoram University leh KVK Lunglei te nen tangkawpin Tomato, French bean, Zikhlum, Sawhthing, Hmarchate, leh polyhouse hnuaia Capsicum leh Tomato chin danah te demonstration hrang hrang kalpui mek a ni.