2353/2025-2026

Dated Serchhip, the 24th November, 2025: Swachh Bharat Mission (Gramin) hnuaia khawpui fai intihsiakna kal zelah vawiin khan Serchhip District MUP bultumin Serchhip khawpui chhungah ‘Faina beihpui thlakna- Faina Hnatlang’ neih a ni.

He hnatlangah hian Serchhip Town Area huamchhunga MUP Area pathum: Serchhip Area, Serchhip ‘N’ Area leh Serchhip ‘S’ Area atangin MUP Member za chuang an thawk chhuak a. Serchhip AOC Veng atanga Serchhip Bazar tan tlangin Serchhip Damdawi In bul Tuizem Dum kawn thlengin faina hnatlang hi neiin, kawngpui dung leh Bazar tual vela bawlhlawh te an thian fai a ni.

MUP Serchhip District huamchhungah hian branch 50 chuang awmin, vawiin hnatlangah hian Town Area-a Branch 16 atangin MUP Member te an thawk chhuak a, khawpui chhung khawlai dung bakah Bazarpui leh a chhehvel te vawngfaitu ni theuh turin District MUP hruaitute chuan mipuite an ngen a ni.

Serchhip Bawrhsap Pu Paul L Khuma chuan District MUP Faina Hnatlang thawk chhuakte thingpui lum nan Rs 10000 a pek bakah Serchhip Kawnpui ‘N’ VC ten Rs. 500 an pe bawk a ni.