Ni 26-27 February, 2019 chhunga Pachhunga University College Auditorium-a neih ‘Mizoram Village Council Conference 2019’ chu vawiin khan Rural Development, etc. Minister Pu Lalruatkima hovin a ni hnihna leh a kharna hman a ni.

Vawiin Conference ni hnihna SIRD&PR Director Pi Maria CT Zuali kaihhruaiah Khuallian Pu Lalruatkima chuan khawtlang neitu tak tak Village Council-te inkhawmpui chuan ram hmasawmna a thlen ngei a beisei thu a sawi a. Mizoramah Lalte ban an nih hnuah, kum 1954 atang khan Village Council neih tan a ni a, khawtlanga mawhphurhna a chhia leh a tha zawng zawng an kovah a innghat ta a ni a ti. Sorkar pawhin mipui thleng phak tak taka hnathawh tur chuan thingtlanga hnuai ber ‘grassroots level’ atanga bei chho a ngai a ni tih hriain local self government pawh a dah pawimawh telh telh a, Village Council-te kutah mawhphurhna leh thiltihtheihna pawh a dah sang telh telh a ni a ti bawk. Village Council-te thlawpna tel lo chuan sorkar pawhin mipuite tana a ruahmanna siamte a hlawhtlinpui thei lo thin a, khawtlang hruaitute nena thawhhona tha erawh chuan hnathawh tlo, tha leh mawi a chhuah thung thin a ni tiin VC Member kalkhawmte theihtawp chhuah zel turin a fuih. Khawtlang tana an hmalakna hrang hrangte bakah sorkar hmalakna an kalpuite chu fel taka an hnathawh dan record vawng tura chahin Minister Pu Lalruatkima chuan an huamchhunga ramngaw, nungcha leh lui/tui humhalh tha turin a chah bawk a; sorkarin March ni 15 thlenga lo hal hun a phal pawh ram tikang lo turin uluk taka vil turin VC-te a chah a ni.

Vawiin Conference Ni hnihnaah heng thupui - MGNREGA / Gram Sabha / Faina / Khawtlag enkawl hmasawnna kawnga hma lak dan - te hmangin Panel Discussion neih a ni a. Moderator-ah Pu KT Pakhuangte, Sr. Core faculty, SIRD≺ Pu Paul Khuma, Under Secretary, RD; Pu Lalchawimawia, Jt. Director, LAD leh Pu Lalchhanhima, Dy. Secretary, RD te an ni. 

Khuallian RD Minister Pu Lalruatkima chuan Village Council thate hnenah lawmman a hlan nghal a. Mizoram pum atangin VC hnathawk tha hming 30 lut zingah a hnuai mite chu tha bera thlanchhuah niin trophy, citation leh pawisa fai pek a ni :

1st Prize : Chiahpui VC, Champhai District (Trophy + Citation + Rs.30,000)

2nd Prize : Khawlailung VC, Serchhip District (Trophy + Citation + Rs.20,000)

3rd Prize : Darlawng VC, Aizawl District (Trophy + Citation + Rs.10,000)

Consolation Prizes : Mualthuam North VC (Lunglei District), West Phaileng VC (Mamit District) leh Khamrang VC (Kolasib District)