Christmas Festival for Communal Harmony chu Mizoram Youth Club buatsaih in Maubawk Primary School -1 kawtah ni 11th December zan 7:00 khan hman a ni a. He hunah hian Pu Lal Thanzara, Health Minister chu khuallian a ni.

Khuallian Pu Lal Thanzara chuan,’ Mizoram Youth Club in Krismas nena inhmeh leh mawi tak maia hnam inpumkhatna lam hawi programme an buatsaih chu finthlak a tih thu a sawi a. India ram ropuina innghahna ber pawh hnam hrang hrang leh leh tawng hrang hrang hmang ten in hriatthiamna leh inpawm tawnna nena hun an nun ho theih vang a nihzia a sawi bawk a. Mizoram Youth Club te hmalakna chu chhuanawm leh India ramah pawh zahpuiawm loh a nihzia chu an programme kalphung atang a lan thu sawiin an Founder President Pu Khamliana chu Mizoram mai ni lo, India ram ah pawh chhuanawm a tihzia leh Mizote tan a hlutzia a sawi a. ‘National Communal Harmony Award’ pawh lo dawng tawh a ni chu Mizote tan chhuan tlak a ni thu a sawi bawk. Mizoram ah pawh hian thalaiten hmasawnna tur tam tak kan neih thu sawi langin, a bikin ruihtheihthil leh zuk leh hmuama insum turin a chah a. Mizoram chhunga mi chengten he hunpui krismas leh kumthar hun hi lungrual taka hmang turin duhsakna a hian nghal bawk a ni.

Khualzahawm Pi Angela Zothanpuii, MCS, Addl D.C. Aizawl Dsitrict; Pu Khamliana, Founder President, Mizoram Youth Club leh Pu Lalramliana Zote, Vice Chairman Maubawk Local Council pawhin thu an sawi a ni.