Vawiin khan Mizoram Youth Commission (MYC)  Chairman Dr Vanlaltanpuia, MLA hovin Chief Secretary's Conference Hall, Mizoram New Capital Complex, Aizawlah "Consultation Meeting on UPSC IAS Coaching" buatsaih a ni a; he meeting-ah hian IAS Coaching hlawk zawk leh awmze nei zawka kalpui dan tur mithiamte nen an sawiho a ni. MYC chuan Alternative Learning System (ALS), New Delhi nen inremna ziaka thawkhovin UPSC Civil Services Online Coaching kalpui nan VSAT Satellite khawl bunin kum 2016 atang khan hmalakna an kalpui tawh a. Hei hi kalphung thara kalpui turin MYC chuan mithiam rawnin july ni 25, 2019 khan Consultation Meeting a lo buatsaih tawh a, chumi bawhzuina atan chuan vawiin a Consultation Meeting hi neih a ni.

He sawiho naah hian Pu Lalnunmawia Chuaungo, Chief Secretary, Dr. C. Vanlalramsanga, Secretary, Planning, Pu Vanlalchhuanga, Commissioner, Finance, Pu Vanhela Pachuau. IAS (Rtd), Pu P.C Lawmkunga, IAS (Rtd), Pu Lalmanzuala, IAS (Rtd), Mizoram Civil Services Association, CYMA, Mizoram College Teachers' Association, MYC Member-te leh sawmbik mipawimawh tak tak an tel a; uluk takin IAS-ah Mizoram thalai an tlin ngei theihna tura hma lak dan tur ngaihtuah ho  niin, Mizoram thalai IAS nih tum tam tak mi tumruhte selection process mumal tak hmanga thlang chhuak a, India ram IAS Coaching Academy tha ber bera MYC sponsor-a tirh chhuah dan tur leh, Mizoram chhungah pawh ruahmanna tha tak siam leh Coaching centre rintlak buaipui dan turte ngaihtuah ho a ni a. Sawi honaah hian hetianga buaipui tur Mizoram thalaite pawh an lo inbuatsaih ve a tulzia sawi tel niin, awareness kalpui a tulzia uar taka tarlan a ni bawk. 

MYC Chairman Dr Vanlaltanpuia, MLA chuan consultation meeting hlawhtling taka neih a ni chu lawmawm a tih thu a sawi a, Mizoram thalaite leh Mizo hnam hmakhua atana thil tangkai a nih thu saWiin hlawhtlinna a puak chhuah ngei a beisei thu a sawi a ni.