Pu Hmingdailova Khiangte, MLA, Chairman, Mizoram Youth Commission chu India International Friendship Society (IIFS) in ‘Glory of India Award’ a hlan.

Hemi puala inkhawm ni 19 June, 2013-a Thailand, Bangkok a neih ah Former Deputy Prime Minister of Thailand Pu Korn Dabbaransi an Pu Hmingdailova Khiangte hnenah a hlan a ni. Hetih rual hian International Publishing House pawhin Pu Hmingdailova Khiangte hi Best Citizen of India Award, 2013 an hlan bawk.

Pu Hmingdailova Khiangte hi Muallungthu-ah piangin kum 1969 ah Indian Army-ah Commission Officer in a lut a. Hetah hian 5 Assam Regiment, Golconda Brigade, Hyderabad hmunah a zawm a. Sipai Officer-a a luh hnu lawk 1971 Indo-Pakistan War-ah pawh khan telin Bangladesh (W. Pakistan) lut hmasa ber te zingah a tel nghe nghe a ni. Sipai ah hun engemaw chen a tan hnuin Mizoram lamah lo chuang chhuakin MPS a zawm a, IPS-ah kaisang leh in ram tana rawngbawlna zau zawk neih a duh avangin DIG a nih laiin voluntary pension in 2004-ah Police hna hi a bansan a ni. 2005-ah Indian National Congress a zawm a, 2008 General Election ah Tuirial (Kawnpui) A/C atangin Congress ticket in MLA atan thlan tlin a ni a, sitting MLA niin tunah hian Chairman, Mizoram Youth Commission hna a vuan mek a ni.

Amah hi mi experience ngah tak a ni a, hemi avang te leh a bik taka Mizoram tana a tha leh tui a lo sen tawh avangte, India sipai Officer leh IPS Officer anihna a India ram tana alo thawh tawhna zawng zawngte an ngaihhlut em avangin he chawimawina hi Pu Hmingdailova hnenah hian pe an nih thu India International Friendship Society (IIFS) leh International Publishing House hian Certificate ah hian an tarlang.