Social Welfare Minister Pu P.C. Lalthanliana chuan vawiin chhun dar 11:00 khan Social Welfare Department hnuaia Mizoram Social Defence & Rehabilitation Board-in a enkawl - ruihtheih thila harsatna tawkte enkawlna Pisgah Reformatory, Thingsulthliah ah Fresher Social Programme a hmanpui.

Minister Pu P.C. Lalthanliana chuan Social Welfare Department hnuaia thawktute chu mihring enkawltu an nih avangin inpekna nena thawh a tul zual a ni,a ti. Kan ram hmelma ruihhlo dova hmalakna ah Sorkar chauhva beih chi a ni lo va, Kohhran leh tlawmngai pawlte nen tanghova theihtawpa beih chi a ni, a ti bawk. Ruihhlo lama harsatna tawk Pisgah Reformatory-a awm mek te chu damna hmun a nih beiseia lo kal mai lovin, damna tak tak chang tur chuan Pathian ah leh anmahni mimal theuvah a innghah thu a hrilh a, Counsellor ten an damna tura an kaihhruaina ang zela thuawih taka an awm chuan damna an chang dawn a ni, a ti. Khawvel mihring finna sang takah pawh ngawlvei damdawi, chakna tireh thei damdawi khawvelin a la siam thei lo va, damna famkim chu Pathian ah chauh a awm thu a sawifiah. Mihring nih chhungin chakna a reh dawn chuang lo a, pal tlang ve a ngai a ni, a ti bawk. Ngawlvei leh ruihtheih thila harsatna tawkte enkawlna home hrang hrang tan Sorkar chuan theihtawpa tan a lak ve mek dante a tarlang a, heng hmuna thawktute chu rawngbawlna rilru pua hmangaihna nen thawk chhunzawm zel turin a fuih bawk.

Fresher Social Programme, Chapel-a hman hi Pi Lalparmawii, C.E.O., MSD&RB -in a kaihruai a, an dinhmun hriatpuia an enkawlna zawng zawngah Sorkar leh Minister chungah lawmthu a sawi. Pisgah Reformatory Project Director Pu F.Lalrokima’n an hnathawh dan report a pe a, tunah hian mi 15 enkawl mek niin thawktu mi 6 an awm mek bawk a ni. Heta awm mek te atangin Testimony ngaihthlak a ni bawk.

Minister hi Social Welfare Department officer ten an tawiawm a, Thingsulthliaha CDPO Office Minister hian a tlawh nghal bawk.