1970/2026-2027

Aizawl, August 28, 2026 : Mizoram Youth Commission chuan vawiin khan MYC Auditorium, MINECO-ah Mizo thalai ten eizawnna tlak thiamna an neih theihna tur atana buatsaih, a thlawna 'Nail Technician Training' programme batch hnuhnung zawk kharna hun an hmang a, he hun hi MYC Chairman Pu Malsawmzuala Ralte chuan a hmanpui.

MYC Chairman chuan nail technician (kut tin leh ke tin cheimawi thiam) training zo te’n an hman nghal tur hmanraw tha tak tak an pe tih sawiin, a thlawna sawrkarin hmanrua a pekte chu sum tam tak thawhchhuah nan tangkai leh uluk taka hmang turin training chhuakte a chah a. Mahni eizawnnate zau zawka tihdarh nan tunlai thiamna hrang hrangte hmang tangkai turin a fuih a, tuna an thlen china duhtawk mai lo tur leh dinhmun sang zawk thleng thei turin duhsakna a hlan a. Eng kawngah pawh Pathian hre reng turin a chah bawk a ni.

Training te pual hian chawhma dar 10-12 inkar khan Marketing class neih niin he hunah hian Department of Commerce, Mizoram University atangin Prof. Laldinliana, Director, MZU Incubation Centre leh Pu Lalremmawia, Project Associate, MZU Incubation Centre te hnen atangin mumal tak leh felfai taka sumdawnna kalpui dan te, e-commerce chungchang leh a hman tangkai dante ngaihthlak a ni.

Nail technician training hi batch 2 kalpui niin, vawiin a training chhuakte hi an vaiin hmeichhia mi 27 an ni a, July ni 31, 2026 khan batch hmasa zawk zawhfel niin training chhuak mi 25 an awm a. Heti hian MYC hnuaia nail technician training chhuak hi hmeichhia 52 an ni. Training fee hi thla 1 ah Rs. 18000 vel niin, training chhuakte hi MYC-in Certificate a pek bakah eizawnna tur bul an tanna atan hmanraw chi hrang hrangte a pe (handhold) bawk a ni.