Mizoram Youth Commission buatsaih, Tuirial Constituency Thalai 40 ten eizawnna bul an tanna tur Vocational Training Course kar 2 awh tur chu vawiin khan Kawnpui Venglai YMA Hall-ah Pu Hmingdailova Khiangte, Bialtu MLA leh Mizoram Youth Commission Chairman chuan a hawng.

Pu Hmingdailova chuan Thalai ten eizawnna kawng an dapna ah Youth Commission chuan a tanpui thin thu sawiin hna kan thawh that chuan kan rama Hnam dang te hi hnawtchhuak tura beih an ngai lo ang a, kan State sum pawh keimahni ah ngei a chambang dawn a ni a ti a. Zirtirtu thiamna sang ringawt hian Naupang result a ti tha chuang lo a, Kohhran leh Private School te hian Result an nei tha zawk tawh mah a ni a ti a. Kan Work Culture a that tawk loh avangin Zoram ah Hnam dang kan ko lut leh thin a; ILP check leh hnawhchhuah ngawt ai chuan hna thawh tur nei lova kan siam a tha zawk a ti.

Mizoram Youth Commission hian Tuirial Constituency thalai te tan Carpentry, Mobile Repairing, Two Wheeler Repairing ah leh Bueaty Culture lamah Training a buatsaih a. Diltu mi 150 zet an awm a; an zing atang hian 40 thlan chhuah an ni. He Vocational Training hi Awithangpa Group YMA leh Kawnpui Jt YMA te nen tangkawpa buatsaih a ni a. Labour & Employment Deptt in Training Instructor an tir a; Kawnpui ah Training chhung zawng an awm chilh ang. Chawlhkar khatna ah hian Theory Training tur a ni a; chawlhkar hnihna ah Practical neih a ni ang. Trainees te hi nitin DA Rs 100/- leh chhun thingpui man tur Rs 25/- zel pek thin an ni dawn a ni. Training hawnna hi Pu C Lalnuntluanga, Awithangpa Group YMA President in a kaihruai a; Pu JT Vanlalngheta Youth Commission Secretary in thu a sawi bawk.