3427/2022-2023
Lunglei the 31st January' 2023: Vawiin chawhnu khan cheng nuai 400 seng a sak Mizoram Youth Commission Youth Centre, Lunglei (Theiriat) ami chu Mizoram Youth Commission Chairman Dr.Vanlaltanpuia chuan khuallian niin a hawng.

Youth Centre hawnna inkhawm hi Pu H. Lalnunzuala, Secretary, MYC chuan kaihruaiin khuallian Dr. Vanlaltanpuia chuan Mizoram Youth Commission Youth Centre hi Lunglei leh chhimlam District thalai ten tangkai tak a an hman theih nana hawn a ni ta chu lawmawm a ti a. Youth Centre din nana hmalatu sorkar hmasa hnenah lawmthu a sawi bawk. MYC hi sorkarin thalai te hmasawnna tura din a ni a, thalai te hmasawnna hrang hrang bakah Mizoram atanga IAS tling kan tlem lutuk leh post pawimawh chelh tur kan neilo ang tih a hlau a, hemi a nih avang hian IAS a kan tlin theih loh avang in state level a thalai lehkha thiam fal deuh te Delhi ah India rama UPSC coaching Academy thaber ah kaltir tura hmalak anih thu a sawi a. Thalai te IIT, NIT, JEE leh MBBS an zir theih theih nan Mega Hybrid Coaching kalpui anih thu a sawi bawk. MYC chuan thalai lekhathiam lo chawikan ngai zawk (Unskill Youth) te local level a hman tangkai theih na tur 'mobile app' siam sak anih thu a sawi a. India ram pawn ah nurse hna thawh theih dan ngaituah sak mek thu sawiin Covid avanga thalai mahni hna kalsana lo haw te tan eizawnna siamsak an nih thu a sawi bawk. He Youth Centre hi thalai ten hmang tangkai a, Mizoram economy chawikangtu pawimawh tak ni tura programme hrang hrang te siam anih tur thu a sawi. MYC Youth Centre din theih nana ram petu Theiriat VC, YMA leh khawtlang mipui chungah lawm thu a sawi bawk.

Pi Ramdinliani, IAS, Deputy Commissioner pawh in thu sawiin MYC Youth Centre hi Mizo thalai te dinchhuahna tur leh chherchhuahna tur anih avangin thalai te an vannei hle a ni, a ti a. He Youth Centre hi thalai ten hmang tangkai se a duh a, ram leh hnam dinchhuah nan hmang a, Lunglei District bakah thenawm District ten tangkai takin hmang se, sorkarin sum leh pai seng in a din a, chhawr tangkai tu an awm lo vang tih a hlau thu sawiin Youth Centre hian ngaihven hlawhin thalai tam takin dinchhuah pui nan hmang se a ti bawk.

Pu Lalmuanzuala, Coordinator, MYC, Lunglei in technical report pein Youth Centre bulding Project Amount hi cheng nuai 400 niin ram zau zawng 1303.98 Sqm, building hi chhawngli a ni.