No.2110/2021-2022

Aizawl dated 3rd September 2021: Vawiin chawhma khan Pu Tawnluia, Deputy Chief Minister chuan Mizorama a pahnihna ni turin Solid Waste Management Centre, Kolasib hawnna hun a hmang a, Pu K.Lalrinliana, Food, Civil Supplies and Consumer Affairs Minister chu khual zahawm niin Pu C.Lalmuanpuia, MLA-in a tawiawm a. Pu K.Lalthawmmawia, Secretary, Urban Development and Poverty Alleviation Department chuan hun a kaihruai bawk a ni.

Khuallian Pu Tawnluia, Deputy Chief Minister chuan bawlhhlawh chu hmasawnna ina a ken tel a nih angin a lakkhawm leh sawngbawl hna kalpui chu a tul hle thu a sawi a, chumi tur a tangkai tak a hman tur Solid Waste Management Centre, Kolasib hawn theih a buatsaih a ni chu lawmawm a tih thu a sawi. Bawlhhlawh sawngbawlna hmun, buaipui hautak tak, hun engemaw chen hna chawlh lailawk tawh, tipuitling tur a hmalak chhunzawm chu Mizoram sawrkarin a ngaih pawimawh thu a sawi a, he Centre tihhlawhtlin leh zualna tur chuan in tin atanga bawlhhlawh thliar kawnga hmalak theuh a pawimawh thu a sawi bawk a ni. Deputy Chief Minister chuan Bawlhhlawh sawngbawlna hmun a bawlhhlawh atanga leitha siam lehna tur hmun awmte leh tawih thei lote sum a chan tir tur a K-NO-W WASTE Pvt. Ltd te nen a inremsiamna tha tak a awm leh zelte chu lawmawm a tih thu a sawi a, hriselna atan a hlauhawm bawlhhlawh paihna tur pawh ruahman fel a nih thu sawiin tangkai tak a hman a nih thuai theih nan phalna dil ngai awmte pawh bawhzui mek a nih thu a tarlang a ni.

Deputy CM chuan hun engemaw chen chu Solid Waste Management Centre, Aizawlah kalpui chhin a lo nih tawh angin harsatna awm thei hrang hrangte zirchian a lo nih tawh thu a sawi a Kolasiba SWMC chu chutiang harsatna awm ve lo tur a beisei a nih thu a tarlang.

Pu Tawnluia chuan faina kawnga hmasawnna a awm theihna tur a hawn tak Solid Waste Management Centre, Kolasib chu hlawhtling tak leh tangkai tak a hman a nih theih nan UD&PA a thawktute mai ni lovin Kolasib khaw mipui zawng zawngte inpekna a pawimawh thu sawiin Sawrkar department hrang hranga thawktute, NGO leh tlawmngai pawl hrang hrangte leh Kolasib mipuite chu thawhhopui ah a sawm nghal bawk a ni.

Khual zahawm Pu K.Lalrinliana, Supply Minister leh Kolasib bialtu MLA ni bawk chuan bawlhhlawh sawngbawlna hmun tihpuitlin nana hna hautak tak hlawhtlinpui ngei tum a Mizoram sawrkarin SEDP sum nen tangkawpa hawn theih a buatsaih a ni chu lawmawm a tih thu a sawi a UD&PA Department kaltlanga Kolasib khaw chhunga hmalakna hrang hrangte tarlangin 4-Lane paltlangna tur a Town Plan felfai tak a awm theih nan ruahmanna a awm thu a sawi bawk a ni.

Hun kaihruaitu Pu K.Lalthawmmawia, Secretary, UD&PA chuan SWMC, Kolasib hawn tak chuan Kolasib khua mipuite tan faina kawnga bung thar an kai phah ngeina turin duhsakna a hlan a. Pu H.Lianzela, Director pawhin SWMC, Kolasib hawn theih a UD&PA Department hmalak dan te tarlangin hemi kawnga tha thawhtute zawng zawng chungah lawmthu sawina hun hmangin chawimawina thilpek a hlan bawk a ni.

Dihmuntlang, Kolasib hi Mizoram khawpui te zinga bawlhhlawh sawngbawlna a Pilot Project turin 2016 khan Detailed Project Report chu approved a ni a. A hmun hi Rengtekawn to Bairabi Road, Kolasib khaw chhung atanga 7 km vel a hla ah a awm a, a zau zawng chu 3.44 Hectares (34400 sqm) a ni.

Kum 2016 atangin DPR Phase-I hnuaia hna hrang hrang thawh tan a ni a. DPR Phase-II chu 2018-a approved a nih hnu in 2018 atangin hna tan a ni.

Bawlhhlawh Tawihthei leh Bawlhhlawh Tawihtheilo paihna turin bawlhhlawh bawm 7,300 sem a ni a. Tin VC Area tin tan mihring hriselna atana thalo (Domestic Hazardous Waste) paihna turin bawlhhlawh bawm lian (Community Dustbin) dum sem chhuah a ni bawk. Kum tinin Swatch Bharat Mission (Urban) hnuaia hmalakna in mipui ah inzirtirna (Awareness Campaign) kawng hrang hrang neih thin a ni a. Kumin ah pawh bawlhhlawh thliar hran dan tur inziahna Stickers thahnem tak siam a ni a, hei hi VC tin ah sem chhuah a ni.
In tin atanga bawlhhlawh thliar hran sa hi May 2021 atangin a hranga lakkhawm a ni a. Heng thliar hran sa hi Solid Waste Management Centre-a a sawngbawlna hmun tur theuh ah thlen a ni ang.

Bawlhhlawh Tawih thei lo (Dry Waste) te chu Waste Resource Management Centre ah hman nawn theih chi (Recyclable Waste) te thliar hran a nih hnuah a bang la awm te chu Bailing Machine hmanga nem muk (compacted) leh tawn that a nih hnuah Refuse Derived Feul atana Factories in a hman turin K-NO-W Waste Pvt. Ltd. kaltlangin thawn chhuah tur a ruahman a ni.

Bawlhhlawh Tawih thei (Wet Waste) te chu Vermi Compost Shed a sawngbawl a nih hma in bawlhhlawh thawih thei lo lo awm palh te thenfai phawt tur a ni a, tin bawlhhlawh lian tham leh saruh te chu shredder ah her sawm phawt tur a ni a. Hemi hnu hian changpat lei tha siam nan bawlhhlawh tawih theite chu hman a ni ang a. Changpat leitha (Vermi Compost) siam chhuah te hi hralh chhuah leh tur a ruahman a ni bawk.

Bawlhhlawh Mihring Hriselna atana hlauhawm (Domestic Hazardous Waste) te chu Landfill Clearance neih hnuah Sanitary Landfill ah mumal taka paih tur a ni. SWMC, Kolasib hi Rs.7.08 Crore senga sak niin heng sum hi Swachh Bharat Mission (Urban) atangin Rs. 668 lakhs leh SEDP atangin Rs. 40 lakhs te a ni.