No.2109/2021-2022

Aizawl, the 3rd September, 2021: Champhai District chhunga lirthei chevel leh mihring an him theihna tura Champhai District Magistrate-in September Ni 21, 2020 a thupek a lo chhuah tawh bawhzuina kalpui zelah vawiin chawhnu khan Road Protection Squad Committee Champhai chu an Chairman Pu Lalnunfela Chawngthu, Sub-Divisional Magistrate hovin an thawkchhuaka, Champhai Bethel Venga kawngpui nekchep zawnga hmalaknate an endik a, dan palzut mante pawisafai chawi tir bakah, insenghawi tura hriattirna pek an ni.

Vawiin Road Protection Squad-te endikna kalpui hmang hian kawngpui dala lirthei hung 3 te chu MV Act 201, obstruction parking hmangin pawisafai Rs.1,000/- theuh chawi tir an ni a. No Parking Area-a lirthei dah 1 chu MV Act 179 hmangin Rs. 500/- chawi tir a nih bakah Driving Licence nei lo mi pakhat chu MV Act 181 hmangin Rs 500/- chawi tir a ni bawk a. Vantlang kawng dala insa leh bungraw dah mi 4 te hnenah hun bi tuk chhunga insenghawi tura hriattirna pek a ni bawk.

Road Protection Squad Committee Champhai chuan vantlang tana hnawk leh kawngpui dal zawnga hmalakna leh hnawk siamte hnenah a rang lama seng hawi tura hriattirna pein a tul angin hma a la thin a. Nikum leh kumin chhung khan Champhai khawpui chhung hnun hrang hrangte fangkualin endikna an lo nei tawh thin a ni. A remchan dan ang zelin veng hrang hrangte fangin, khawtlang hruaitute nen endikna an kalpui chhhunzawm zel dawn a ni.