No.2108/2021-2022

Aizawl Mimkut thla ni 3, 2021: Lawngtlai Bawrhsap Dr Andrew H. Vanlaldika chuan nimin khan Lawngtlai leh Lunglei inkar national highway kawngpui laih zau hna thawh mek chu Central YLA hruaitute nen a hmunah kalin an enfiah a. Hna thawktu ABCI hotute nen hma lak zui zel dan tur an sawi ho.

Lawngtlai Bawrhsap leh Central YLA hruaitute hi kawng laih hna en hian Lawngtlai atangin Tawipui North thlengin an kal a. An thawh tawh chin dinhmun leh an thawh chhunzawm dan tura an hmuh dan leh duh dan te chu hna thawktu ABCI hotute hi an sawipui nghal a ni.

Lawngtlai Bawrhsap Dr Andrew H. Vanlaldika chuan Lawngtlai District leh Siaha District atangin damlo na tak tak, hmanhmawh taka hmunpui lama phurh ngai te an awm thin a, tuna kawng dinhmun chu damlo inphurhna chi a ni lo tih sawiin, kawng zauh hna chu duh anga thawh hleih theih a nih loh lai paw'n, kawng khuar zual lai te chu a theih ang anga hnawh thin turin hna thawktu Company hotute chu a hrilh a. Kawng chhiat vanga kawng laka harsatna tawk khualzin an awm theih avangin kawng chhiat zualna lai phei chu a tul hun apianga thawk chhuak thei tura chhun zan zawma khawl nena vil turin a hrilh bawk.

Lawngtlai Bawrhsap chuan Lawngtlai District chhunga zangnadawmna vanga kawng zauh hna thawh chhunzawm harsatna lai te en nghalin, ram neitu leh Company hotute nen a chin fel dan tur a hmunah hian an sawi ho nghal a ni.

Lawngtlai Bawrhsap leh Central YLA hruaitute hian 3rd IR Batallion hmun, Thingkaha COVID-19 positive enkawlna Covid Care Centre (CCC) chu tlawh nghalin, an dinhmun leh mamawh te an enpui a. Lawngtlai Bawrhsap chuan tun dinhmunah CCC ruahman sain la zo rihin lang mah se, Lawngtlai District-a hri kai thar an pun dan ngaihtuahin, a tul anga CCC chu ruahman belh tura hma lak reng a tul thu a sawi a. CCC-a awmte'n awlsam zawka damdawi an lam theih nan Lawngtlaia Health Department hotute sawipui a tum thu a sawi bawk.