No.2107/2021-2022

Aizawl, the 3rd September 2021: Vawiin chawhma dar 11:00 khan Aizawl District Education Office buatsaihin Aizawl District huamchhunga Zirtirtu tha chawimawina ‘Aizawl District Teachers’ Award’ hlanna inkhawm DSE Conference Hall, Education Centre, Treasury Square, Aizawl-ah neih a ni a. He hunah hian Aizawl District Teachers’Award 2021 chu Pi J. Hmingduhawmi, Headmistress Govt. Tanhril P/S- I, Pu H. Lalhlimthanga, Headmaster Govt. Dinthar M/S-II leh Pu Michael Lalramliana, Teacher Tuikual North H/S ten an dawng a ni.

Pu James Lalrinchhana, Director School Education chuan he hun hi a hmanpui a. Zirtirtu tha chawimawina dawngte chu a lawmpui thu sawiin zirtirtute chu zirna tihhmasawn nana a laimu, hmun pawimawh ber luahtute an nih avangin ram pum, state leh District huapin hna thawk thate chu chawimawina pek an nih thin thu a sawi a ni.

Teachers’ Award atan tehfung chi 11 hmanga hman thin a nih thu a sawi. Chawimawina dawng te hi mi chhuanawm tak tak an ni tih sawiin Mizoram chhunga zirtirtute chu Target Planning nei tura fuihin kum tin Target neia hma an lak chuan kum 5 chhung chuan nasa takin hma kan sawn thei dawn a ni, a ti. Hmathlir leh rualawhna kalkawptir chunga zirlaite kaihruaia ram leh hnam hmasawnna atana chhawr tlak mi thiam chher chhuak zel tura tan la lehzual turin a fuih bawk a ni.

Zirtirtu tha Award semna inkhawm hi Pu Lalramthianghlima, DEO, Aizawl District chuan a kaihruai a. He hunah hian School Education Department Officer-te leh zirtirtu tha chawimawina National Award leh State Award dawng tawh thenkhatte an tel a ni.

Attachment

  • Loading attachment...