No.2106/2021-2022

Aizawl the 3rd, Sept' 2021: Vawiin khan Irrigation & Water Resources Department Minister Pu C. Lalrinsanga chuan National Hydrology Project hnuaia Lui tui luangzat tehna hmanrua chi hrang hrang (river discharge measuring equipments- acoustic Doppler current profiler, acoustic Doppler velocitimeter, current meter leh a khaihhnawih dangte) Aizawl, Lunglei, Champhai, Kolasib Division a hmantur hlanna hun Irrigation & Water Resources Department Committee Room-ah a nei a.

Minister chuan thu sawiin Irrigation & Water Resources Department chu hnathawktute indaihloh karah pawh theihtawp chhuaha tha hnem ngai taka thawk thin an ni, a ti a. Khawvel sik leh sa lo danglam zelah ‘tui’ pawimawhna a lo lang zel a, Agriculture, Horticulture, Industry leh thildang hmasawnna kawng zawhna hrang hrangah tuihna (water resource) a that loh chuan thui tak a kal theihloh thu sawiin, National Hydrology Project-in a tumber chu ruahtui tla zat, kan tui neih- lui, dil, tuikhuah, ground water kan neih zat (quantity leh quality) te rintlak zawk leh changtluk zawk data leh information neih theih hi a ni, a ti a. Leichhunga tui inkhawl hnem leh recharge dan zir chian te, run-off engzatnge awm tih te leh ruahtui engzatnge kan dawn tih te zirchianna neih a, kumtluana kan lui tui luang zat hriat chianna chuan kawng chi hrang hrang a rahbi rahtheihna tur, finna leh remhriatna kengtu tur a ni dawn a ni tiin a sawi. Mizoram a water bodies leh tui hna te hi sawrkar chuan awmze nei zawk leh kalphung tha zawka a kalpui theihnan Mizoram Water Resources Regulations & Management Bill submit tur department in a peih fel tep thu a tar lang bawk a ni.

IWRD chuan National Hydrology Project hnuaiah heng hmanraw lei nan hian cheng nuai 184.12 a seng a. Kum 2019, 2020 khan Mizoram chu India rama National Hydrology Project kalpui tha ber a ni a, Kum 2021 ah hian pahnihna a ni thung a ni. He project hnuaiah hian Lui 16 measurement lak a ni ang a, rain gauge hmun 31 ah dan a ni bawk a, tui lian leh khawkhengin chhiatna a thlen tam tak venna kawngah leh Water Resources kaihhnawih project chi hrang hrang siam nan a pawimawh dawn a ni. Ecology zirna a pawimawh em em E-flow chhutnan, luia nungchate dam khawchhuahna tur engtik lai pawh a a luan reng theihna tura data leh information khaikhawm tu project a ni bawk a ni.

He hun hi IWRD Secretary Pu J. Hmingthanmawia’n kaihruaiin, IWRD Chief Engineer Er. Lalrotluanga chuan technical report a pe bawk a ni.