Vawiin khan Champhai North Bialtu MLA Pu TT Zothansanga Parliamentary Secretary, Govt of Mizoram chuan Mizorama a 4 na ni turin SBI Champhai ah E-Corner a hawng.

Hawnna inkhawmah hian Pu TT Zothansanga chuan thu sawiin E-Corner hawn theiha peihfel a ni ta chu Champhai tan hmasawnna nasa tak a nih thu a tarlang a. Bank dawr avanga mipuiten hun nasa tak an khawhral thin chu he hmasawnna hian a ti ziaawm dawn tih a sawi a, E- Corner peihfel tak zarah hian mipui Bank dawrtute leh Bank hnathawkte inkara hun tamtak senga hmaichhana indawr ngai thin chu za a 85 zetin a chhawk zangkhai dawna hei hian mipuite tan Bank hna tihfel alo awlsawm phah zawkin hun leh tha nasa takin a hum dawn tih a sawi a. Bank dawr awlsam zawk nana hmasawnna tha tak E-Corner chu Champhai mipuite a hlan a ni.

E-Corner hmang hian Bank kaihhnawih thil hrang hrang Cash Deposit Machine (pawisa dahluhna), ATM (pawisa lakchhuahna, pawisa thawnna), Cheque Drop Box Machine, Bar Code Based Passbook printer (passbook print na), Stand Alone Green Channel Counter (ATM Card hmanga pawisa thawnna) te a tih theih a. Zing Dar 5 atanga zan Dar 9 thleng hawn a ni anga Bank chawlhni ah pawh hawn a ni dawn a hei hian mipuite tan Bank hna kaihhnawih ah awlsam zawkna a thlen dawn a ni. Champhai SBI E-Corner bakah hian SBI E-Corner hi Aizawlah 2 leh Lunglei ah 1 a awm mek bawk ani.

Hawnna inkhawm ah hian SBI Champhai Lead Bank Manager Pu SP Sarma leh SBI hnathawkte bakah Champhai College Principal Pu Lalnunmawia leh khawtlang hruaitute an tel a ni.