District Rural Development Agency (DRDA), Kolasib buatsaihin vawiin khan Parish Hall, Venglai Kolasib-ah “Sankalp Se Siddhi Abhiyan - Attainment Through Resolve” pualin hun hman a ni a, Tuirial Bialtu MLA Pu Hmingdailova Khiangte, Parliamentary Secretary in a hmanpui.

He hunah hian Pu Hmingdailova Khiangte chuan India in British awpna atanga a zalenna a sualchhuak ang khan tunah hian saltanna chi hrang hrang atang zalenna kan sualchhuah a ngai a ni a ti a. He kan saltanna hrang hrang - chibing inthliarna te, sakhaw inthliarna te, firfiaka chetna te leh a dangte atanga kan chhuah theihna tur leh India thar ‘New India’ siam tura Prime Minister zahawmtak hmalakna hi a hlawhtlin theih nan mitinin mawh kan phur a ni a ti a. Ram nuam zawk siam thei tur leh hmasawnna kawng min daltu chu i thlauhthla ngam ang u tiin kalkhawm te a chah a ni.

District Bawrhsap Dr.Arun T., IAS pawhin thusawiin, Sorkar laipui in scheme tha tak tak a duang chhuak a, heng zinga pakhat pawh hi hlawhtling tura hma kan lak tak tak chuan hmasawnna kan hmu dawn a ni tiin, mipui leh sorkar hnathawkte tanrual angai a ni a ti.

Vawiina hun hman hi Pu Lalnunhlua, Project Director, DRDA in a kaihruai a, Sankalp Se Siddhi Abhiyan nihphung Pi C.Lalduhzuali, BDO Bilkhawthlir in a sawifiah a. Pu Stephen Laltlansanga Auhmun, APO(M), DRDA kaihhruaina hnuaiah  Sankalp Se Siddhi Abhiyan hnuaia India thar siam tura intiamna kalkhawm ten an nei a ni. BDO Thgingdawl Pu Gaston Vanlalhriatpuia’n lawmthu sawina in hun a khar a ni.

Sankalp Se Siddhi Abhiyan - New India Movement hi India mipuiten kum 1942 August thlaa  Quit India Movement an lo neih tawhna champha kum 75 naah neih tan a ni a. Quit India Movement neih a nih atanga a kum ngana ah chiah India ramin ramdang awpbehna ata zalenna a lo hmu ta ang khan; New India Movement neih tan atanga a kum ngana kum 2022-ah India ram chu Bawlhhlawhna, Retheihna, Hlemhletna, Rawlral leh Firfiaka chetna, Sakhaw intihbingna leh chi leh chi inthliarna lakah zalen turin hmalak a ni dawn a. ‘Sankalp’ hi Sanskrit niin ‘intiamna’ tihna ni a, ‘siddhi’ hi Tamil niin ‘hlenchhuak’ tihna a ni a, India thar siam tura intiamna hlenchhuak tura hmalak chu he scheme hian a tum ber a ni.